Arroita eta Arrate dira Lekeitioko Trinkete Txapelketa irabazteko faboritoak

2014/03/13

Trinketeko jokalariak eta epaileak

Domekan, 10:00etan hasita erabakiko dira azken sailkapen postuak. Ordu horretan bosgarren eta seigarren postua egongo dira jokoan. Aurrez aurre egongo dira Asti-Navarro eta Frias-Berris. Astik eta Friasek lehen txapelketa dute, eta ilusio handiagaz aritu dira kanporaketa guztian. Azken emaitza ikusita, ez dago faborito argirik. 11:00ak aldera hasiko da jokatzen hirugarren eta laugarren postua erabakiko dituen norgehiagoka: Beraza eta Etxeberria elgoibartarrek Moral eta Laka izango dituzte aurrean. Iaz elgoibartarrek lortu zuten brontzezko postua, baina Moral eta Laka finalerako txartela eskuratzeko oso gertu egon dira, eta horrenbestez, eurak kantxaratuko dira faborito legez. Finala 12:00etarako dago iragarrita: Arroitak eta Arratek azken hiru urtean jokatu dute finala, eta birritan irabazi dute. Aurten ere faboritoak dira, baina Telleria eta Bastida gorantz etorri dira txapelketak iraun duen bitartean, eta ezustekoa ematen saiatuko dira. Arri izango da epailea. Txapelketako hainbat laguntzaile eta udaleko kirol arduraduna izango dira sariak banatzen.