Erropa eta tela zaharretatik abiatuta, papera egiteko aukera egongo da zapatuan, 16:00etan, plazabarripean. Eskuak masan sartu eta bakoitzak bere papera egiteko aukera edukiko du Margaret Mahan eta Drew Matott Paper Peace proiektuko arduradunen gidaritzapean. Prozesu erraz eta dibertigarria dela jakitera eman du Margaret Mahan-ek. Materiale desberdinak erabiliko dituzte papera era berezian egiteko, eta gero bakoitza bere paperagaz joango da etxera. Auto eta bizikleta baten laguntza ere izango dutela aurreratu du Mahanek. Gainera, nahi duenak, bere arroparen bat eraman dezake papera egiteko.
Paper Peace Project
Papera egiteko zuhaitzak erabiltzen hasi aurretik telak erabiltzen ziren papera egiteko. Telak erabiltzeko ohitura hori berreskuratu dute Margaret Mahan eta Drew Matott-ek. Linoa eta algodoia behar dira papera egiteko. Edozein erropak balio du, baina zenbat eta lino edo algodoi gehiago izan papera hobea izaten da. “Gaur egun erabiltzen dugun erropak poliester asko darama, baina guk zelulosa gehiago sartzen diogu bateren batek beste era bateko erropa ekarriz gero”, argitu du Margaret Mahanek.
Tailer bakoitzean egiten duten papera katalogoetan gordetzen dute errezeta bertan idatzita, eta gero, Yaleko unibertsitateko liburutegira bidaltzen dute. “Parte hartzaile bakoitzari bere paperik txarrena eskatzen diogu eta gorde egiten ditugu guztiak”, zehaztu du.
Drew Matott 1998an hasi zen papera egiten arte grafikoak ikasten zebilenean. Bere paper propioa egiten hasi zen materialeagaz beragaz ere erlazio bat edukitzeko. Zeraman erropak istorio bat gordetzen zuela pentsatu zuen eta hori paper bihurtuz gero paperak ere istorio bat izango lukeela. Horrela tailer bat jarri zuen abian. “Nik bere tailerrean ikasi nuen ikasle nintzenean eta graduatu ondoren biok Peace Paper Project (Bakearen Paperaren Proiektua) sortu genuen”, azaldu du Mahanek. 2011tik bidaiatzen dabiltza eskuz egindako paperaren prosezua irakatsiz.
Terapia
Baina proiektua oraindik haratago doa. Paperaren tailerra terapia emateko bide bat bihurtu dute. Esperientzia txar bat izan duen jendeak esperientzia horregaz lotzen duen erropa paper bihurtu dezake, zer edo zer positibo bihurtuz. “AEBn gaur egun arteari lotutako terapiak interes handia sortu dute. Medikuntza orokorretik kanpo dauden terapiak dira”.
Prostituziotik atera zituzten andra eta neskatileri tailerra ematera joan zen Dreww Matott Indiara. Horretarako makina erabilgarria prestatu zuten, eta orain makina hori motxilan, leku batetik bestera bidaiatzen dute tailerra emanez. AEBn zehar, Turkian, Alemanian, Irlandan, Ingalaterran, Eskozian, Kosobon, eta Sarajevon egon dira besteak beste. Orain, Poloniara joatea da euren asmoa. Auschwitz-en dagoen Bakearen Museora. Kontzentrazio eremuaren inguruan daudean landareekin papera egin nahi dute bertan. Irako borrokalari ohiekin, gudetako beteranoekin, Londresko metroko atentatuan bizirik atera zirenekin, genero indarkeria jasandako emakumeekin…Era askotako sufrimendua jasan duteneri emozioak bideratzen laguntzera joaten dira.
“Prozesuan sinisten dugu eta tailerrak beti positiboak izaten dira” dio Mahanek. “Papera dute eta zer edo zer aldatzen da jendearengan”.
Markina-Xemeingoa baina, ez da terapia bat izango, jaia baizik. “Ondo pasatzeko aukera bat papera eginez”.
