Bilduren aldeko botoekin onartu zen 2014ko udal aurrekontua, behin-behinean. EAJk kontrako bozka eman zuen. Hasiera bateko onarpena eginda, hamabost eguneko epea egongo da aurrekontuari alegazioak egiteko. Diru sarrera nagusia udal kutxatik jasoko du Ondarroako Udalak. Dena dela, Ibaiondoko garajeen alokairutik 360.000 euro jasotzea aurreikusten da aurrekontuan, eta diru sarrera hori egon ezean, 9.204.350 eurokoa izango litzateke aurrekontua, euro batzuk gorabehera.
Gastuei dagokienez, pertdonal gastua izango da nagusiena: 3.642.435; eta ondasun arrunt eta zerbitzuaena ondoren: 3.175.590 euro. Partida garrantzitsuena Lea Artibai Amankomunazgoari ordaintzen zaiona da gastuetan, 946.000 euro ingurukoa: Gaztebiz programaren; ingurumen zerbitzuen (hondakinen kudeaketa); gizarte ongizate zerbitzuaren eta 2013ko defizitaren ordainketa. Gastuak txikitze aldera, 2013an neurriak hartu zituen udalak: argi potentziaren azterketa eta doiketa egin ziren; berritu behar diren kontratazioetan doiketak egin ziren eta jarduetarako aurrekontuak doitu ziren.
“Turismo bulegoaten kudeaketa berrituko da, garbiketakoa ere bai, “ahal den heinean doketak egiteko”. Hemendik aurrera, doiketa posibleak eginda egongo dira”.
Inbertsioak, Iper Kalen, udaletxe zaharrean eta Arrigorri ostatutan
Inbertsio nagusiak lau izango dira: auzokonposta-autokonposta sarea handitzea; Iperkaleko bidea berritzea, udaletxe zaharraren teilatua berritzea eta Arrigorri ostatuaren eskailera eta terraza konpontzea. Iper Kale urbanizateko 40.000 euro erabiliko dira, “hango biztanleek dauzkaten hainbat gabeziri irtenbidea emateko”. Zerbitzu sarea ipiniko dute, –gas naturala, fribra optikoa– . 117.000 euro kostatuko da udaletxe zaharreko teilatuaren konponketa. “Hasierako proiektua eginda dago, baina oraindik zehazteko dago noiz egingo diren konponketak. Aurten ez bada, hurrengo urtean egingo dira”, esan du Argia Ituarte alkateak. Arrigorrin, berriz, egokitzapenak egingo dira: bigarren irteera bat ipiniko da. Eskailera eta terraza ere konpondu egingo dira. 50.000 euro aurreikusten ditu udalak horiek egokitzapenak egiteko.
Bestalde, 524.033,11 euroko aurrekontua aurreikusten da Ondarroa Lantzen-entzat. Bi aurrekontuak bat eginda, 10.088.383,11ko aurrekontu bateratua izango du udalak.
