Lekitto Bedarra: ametsak errealitate bihurtzen
Luzaroan gogotsu lan egin dute. Helburuak ondo zehaztuta, gutxinaka-gutxinaka, handia da lortu dutena. Eta aurrera begira dituzten erronkek ere, etorkizun oparoa iragartzen die. Auzolana dute oinarri, hasiera-hasieratik. «Gaur zuregatik eta bihar niregatik», filosofia horrekin, Lekitto Bedarra taldeak ekinez eta eginez bidea egiten jarraitzen du, sasi guztien gainetik.
Etenik barik lan eta lan ibili eta gero, Lekeitioko Usotegi parkeak zuen itxura goitik behera aldatu dute taldeko kideek; pausoz pauso egin dituzte gauzak.
Aurten, esaterako, «posible ziren helburuak» betetze aldera, ikastaroak izan dira taldeak aurrera eroan dituen ekintzak. «Inusketa ikastaroa, konposta egitekoa, bio-ongarriena… egin dugu. Azken horretan sekulako parte hartzea egon zen; 116 lagun inguru batu ginen».
Ikastaro guztiak «praktikoak eta eraginkorrak» izan direla esan dute taldeko kideek. «Ikastaro bakoitzaren amaieran inkesta bat betetzeko eskatzen diegu parte hartzaileei. Balorazio oso onak jaso ditugu».
Hirugarren ikastaroa ekainaren 20an egingo dute. «Horretan botika naturalak zelan egin landuko dugu», aurreratu dute. «Gure helburua botika kimikoak erabili barik gaitzak zelan sendatu irakastea da».
Dorrea, laster erabilgarri
Aurten, gainera, taldeak beste lorpen bat ere badu: Usotegiko dorrea erabilgarri edukiko dute laster.
Luzaroan ibili dira taldeko kideak Usotegin dagoen usotokia atontzen. Gorabehera askogaz, azkenean, auzolanari eta herriko profesionalen borondateari esker, eraikinaren beheko aldea erabiltzeko moduan edukiko dute egun batzuk barru. «Horrek asko suposatzen du guretzat. Izan ere, ortugintzarako erabiltzen ditugun tresna eta materialak bertan gorde ahal ditugu. Eta ondorioz, ez gara tresnekin atzera eta aurrera ibiliko».
Dorrea erabilgarri edukitzea aspaldiko ametsa dela diote. «Taldeko kideon, udalaren eta Del Valle sendiaren arteko elkarlanari esker, hori posible izan da».
Beraz, behin ekainaren 20an azken ikastaroa egin eta gero, urteko egunik luzeena dela aprobetxatuz, ekitaldi bat egingo du Lekitto Bedarrak. «Su txiki bat egingo dugu eta dantzaria ere ekarriko dugulakoan gaude. Ondoren txorizo errea eskainiko diegu ekitaldira gerturatzen direnei. Ekitaldi xumea eta polita izango da».
Hileko lehen astelehenean batzen dira taldeko kideak, kultur etxean. Horrez gain, zapatu guztietan, Usotegin lan eta lan aritzen dira kideak. «Bakoitzaren landarak nola doazen ikusi, auzolanean egin beharreko lanak egin eta denaren gainetik, elkarrekin ikasten dugu».
Aurten gainera, parke aurreko jardinerak ere apaindu dituzte. «Parkean egiten duguna erakuste aldera apaindu genituen jardinerak, besteak beste, letxuga, kalabazin eta lorekin».
Euren helburua auzo ortuak edukitzea dela diote. «Esperientziak elkartrukatzeko, batik bat». Baina amets horretatik oraindik urrun badaude ere, gutxinaka-gutxinaka, bidean aurrea jarraitzen dutela diote.
Momentuz, hurrengo pausoa Usotegin bost auzo ortu sortzea litzatekeela diote. «Gero, horren atzetik, beste proiektu batzuk etorriko lirateke».
Orain arteko bidean, aurrera
Jasangarritasuna da denaren gainetik taldeko kideek bultzatzen dutena. «Eskuak lurrean sartzen ditugu, eta hori badakigu. Baina egiten duguna natura errespetatuz egiten dugu».
Elkarlana abiapututzat hartuz, eta herrian auzo ortuak egiteko ametsari jarraituz, orain arteko bidean aurrera egiten jarraituko dutela gaineratu dute. «Nahi duenarentzako ateak zabalik ditugu. Bien bitartean, orain arte lez, formatu txikiko gauzak egiten jarraituko dugu».
Horrela ba, apurka-apurka, helburuak ondo zehaztuz, Lekitto Bedarrak ametsak errealitate bihurtzen jarraituko du.
Lekitto Bedarrako kide batzuk, Usotegi parkean.
