Mutrikuko Balea elkarteak zuzendari berria du
2011. urtean Mutrikuko Udalaren, Debegesaren eta Arrantzaleen kofradiaren artean sortutako Balea elkarteak eraldaketa sakona izan du azken egunotan. Alde batetik, elkartearen sorreratik egindako lanaren ostean, arrazoi legelak direla eta, Udala eta Debegesa elkartearen kanpo geratu dira; eta, bestetik, itsas-sektorearekin lotutako interesak dituzten enpresek bat egin dute elkartearekin (komertzioak, enpresak, tabernak…). Gaur egun, elkarteak 12 bazkide ditu, eta bazkide berrientzako ateak irekita daude.
Prozesu honen ondorioz, Zuzendaritza Batzordea berritu du Balea elkarteak. Aurrerantzean, lehendakaria Santi Rios izango da, eta diruzaina Javier Aginaga. Bestalde, orain arte proiektuko koordinatzailea izan denak, Jose Rejok, beste lan errronka bati aurre egiteko elkartea utzi du. “Joseri urte hauetan egindako lan guztia eskertu nahi genioke”, azaldu dute elkarteko kideek. “Gure aldetik, gestio talde berriaren eraketa osatzear gaude, eta talde berri horrek indar berrituekin eta ilusio handiarekin ekingo dio proiektu berriari”, adierazi dute.
Horrez gain, 2014-2015 gestio plana ere martxan ipini dute Balea elkarteko kideek.
Urte horietarako bi helburu nagusi ipini dituzte: alde batetik itsasoari lotutako enplegua sustatu nahi da, eta beste alde batetik, portuak eta bere inguruak dinamizatu.
Enplegua sustatzeko honako ekintza hauek definitu dira:
-
Akuakultura proiektu bat martxan jarri (abaloia, itsas-zizarea, korala…)
-
Arraina merkaturatzeko enpresa baten eraketa babestu
-
Eguneko arraina bereizgarri duen jatetxe bat martxan jarri
-
Artisau arrantzako bi ontzi gehiago erakarri
-
Artisau-kontserbak egiteko eremua sortu
-
Kontserba-enpresa baten sorrera babestu
Portua eta inguruan dinamizatzeko, berriz, honako ekintzak planteatzen dira:
-
Eusko Jaurlaritzaren Garraio Azpiegituren Zuzendaritzarekin elkarlanean portuan dauden lokalen eta eremuen banaketan egin, aktibitate ekonomikoari lehentasuna emanda
-
Eguneko arrainen dastaketak antolatu
-
San Pedro Eguna berreskuratu
-
Portuko itsas-xaflak definitu aisialdi eta kirol erabilera berrientzako
