Dragatze lanak "hondartzetatik gertuegi" egiten ari direla salatu du Eguzkik

Lea-Artibai eta Mutrikuko Hitza

2014/06/10

Draga Saturrarango aurrean deskargatzen

Dragatze lanak hondartzetatik gertuegi egiten ari direla salatu nahi izan du Ondarroako talde ekologistak. “Txalupen segurtasunagatik Ondarroako portu sarreratik hondarra kentzea ez dugu txarto ikusten, baina lanek pertsonen segurtasuna ere kontutan eduki beharko lukete. Ondarroako Arrigorriko eta Mutrikuko Saturrarango kasuetan, hurbilegi egiten ari dira lanak, kasu batzuetan, igerilariak berta-bertan daudela ere”, azaldu dute eguzkikoek. Zehatz esateko, hondarra noiz dragatzen duten eta berau nora botatzen duten zalantzan jarri dute Eguzkikoek. Horrela ba, lan horiek beste ordu batzuetan eta jendea dagoen tokitik urrunago egitea eskatzen du talde ekologistak. “Momentu honetan, hondartzetatik 50 metro baino gutxiagora ari dira dragatzen, egun argiz. Lan hauek beste ordu batzuetan egitea eskatzen dugu”. Saturraranen joan den asteko zapatuan gertatutakoa Eguzkik salatzen duenari erreparatuz, zapatuan gertatu zen horrelako adibide bat Saturraranen. Arratsaldean, hondartza jendez gainezka zegoela, dragak Ondarroako portu sarrerako hondarrak hartu eta Mutrikuko hondartzaren aurrean, berta-bertan, bota zituen. Horrek, momentu hartan han zeudenak aho zabalik utzi zituen. “Igerian zebilen bati paretik kentzeko turruna jo zion dragak. Ostean, barruan zuen guztia hondartza aurre-aurrean hustu zuen. Sinestezina izan zen”, azaldu zuen momentu hartan hondartzan zegoen herritar batek. Horrek guztiak, hondartzan zeuden guztien artean sekulako zeresana sortu zuen.