LABek Bilbon salatuko du etzi Etxebarriko TMAko langileak jasatzen ari diren errepresioa

2014/07/15

TMAko langileak Durangoko mobilizazio batean, artxiboko irudian.

10:30ean Bilboko Epaitegiaren aurrean –Buenos Aires kalean– batzeko deia egin du sindikatuak, Langileon borrokaren kriminalizazioari Stop lemapean. LABek argi dauka enpleguaren defentsan langileen borroka ezinbestekoa dela. “Langileak dira beraien lanpostuen defentsa bermatu dezaketen bakarrak”, esan dute langile guztiei mobilizazioan parte hartzeko dei eginez. “Gogor salatu nahi dugu gaur egungo legediak enpresariei ematen dien inpunitatea eta langileen babes eza. Enpresariek edozer egitea libre duten bitartean, langileek aldentze neurriak sufritu behar dituzte eta epaiketara joan behar dute, .beraien eskubideen defentsan borrokatzeagatik eta enpresarien irregulartasunak kontralatu nahi izateagatik. Ezin ditugu onartu langileriaren kontrako injustizia gehiago. Langile klasea kriminalizatzeari utzi behar zaio, horrelako enpresariak babesten diren bitartean”.

TMA Patxi Arakistainek Etxebarrian zuen enpresa zen, eta 2013ko apirilean Rafael Zabala Fernandezek enpresako boterea hartu zuen. Zortzi hileko greba mugagabe baten ondoren, langileak kalera bota zituzten. Enpresaren itxiera eman orduko, Rafael Zabalarekin hainbat akordio egin zituzten, langileekiko zorrak kitatzen hasteko. “PRECOn bertan ere. Zabalak ez zuen esandako ezer bete”. Langileak lau hileko zorrarekin kaleratuak izan ziren, eta FOGASAk egin zituen ordainketak. “Langile batzuek 4.000 euro ere galdu zituzten orduan”. Zabalak ez zuen ezer ordaindu orduan ere, sindikatuak jakitera eman duenez.

Enpresariek edozer egitea libre duten bitartean, langileek aldentze neurriak sufritu behar dituztela eta epaiketara joan behar dutela salatu du LAB sindikatuak

Ez hori bakarrik. Kaleratze indemnizazioak FOGASAk ordaindu zituen, 18.000 euroko mugagaz, langile batzuen indemnizazioa 60.000 eurotakoa zenean. “Rafaelek ez zuen ezer ordaindu”. Haratago joanda, langileekin amaituta zeuden pieza batzuen salmenta adostu zuen Zabalak, langileekiko zuen zorra kitatzen hasteko; sindikatuak esan duenez, ez zuen bete adostutakoa.

Horrez gain, konkurtso prozesuan, enpresak hainbat irregulartasun egin ditu –administratzaile konkurtsalak ere egiaztatzen du hori epaitegian aurkeztutako txostenean–: materialaren salmenta administratzailaren baimenik gabe, makinak desagertu dira, kapiala mugitzea administratzailearen baimenik gabe, epaile aginduak ez betetzea,… “Hori guzti hori gutxi balitz, Zabalak salaketa penalak jarri zituen hainbat langileren kontra, legalki komunikatutako manifestazio eta elkarretaratzeetan lan gatazka kalera ateratzeagatik”. Haratago joanda, bi langileren kontra kautelazko urruntze neurria eskatu zuen Zabalak. Lan gatazka kolektibo baten aurrean bi pertsonen kontrako kautelazko neurriak zentzurik ez zuela argudiatuta, Gernikako epaitegiak eskaera ukatu bazuen ere, Bizkaiko audientzia probintzialak neurria onartu du. Beraz, epaiketaren zain dauden bitartean, bi langileri –bata langileen ordezkaria izandakoa da enpresa itxi arte– 500 metroko urruntze agindua ezarri diete. “Guzti hori beraien lanpostuak eta eskubideak defendatzeagatik. Justiziak ezin ditu biktimak kriminalizatu eta errudunak babestu, nahikoa da!”.