Baserri giroko azoka baino askoz gehiago izango da zapatukoa. Izan ere, nekazaritza eta artisautza produktuak erakutsi eta saltzeaz gain, pilota partidak eta Garagardo Festa ere egongo dira azokaren bisitarientzako.
Erakusmahaiak goizeko 10:00etatik 14:30ak alderarte egongo dira zabalik, herriko eta inguruko baserritarren produktu freskoez beterik. Izan ere, hamabost erakusmahatik, gehienak Lea Artibaiko bizilagunenak izango dira. Besteak beste, Ispaster, Berriatua, Munitibar, Lekeitio eta Markina-Xemeingo baserritarrak eta artisauak egongo dira. Idiazabal eta ahuntz gaztak, arrain zein fruta kontserbak, barazki ekologikoak, baserriko ogia eta pastela, sagardoa, txakolina, eskuz egindako pilotak, bitxiak… zer ikusi eta zer erosi ez da faltako azokan.
Garagardo jaia
Halaber, 12:00etatik 15:00etara herritarrek garagardo mota desberdinak probatzeko aukera edukiko dute prezio onean. Garagardo Festa Gure Esku Dago-k antolatu du, biharko Eskoziako erreferenduma babestuz, eta euskal herritarron erabakitzeko eskubidearen alde.
Era berean, 11:00etatik 15:00etara parrilan okela erretzen ibiliko dira. Hala, euro baten truke okela pintxoa dastatzeko aukera egongo da.
Bestalde, Mikel Goñi pilotaria izango da Ispasterko frontoian egingo duten esku pilota jaialdiko izarra. 12:30etan hasiko da jaialdia umeen partidarekin. Ostean binakako partida jokatuko dute Mikel Goñik eta Arkotxak Uriona eta Uriondoren kontra. Ikuskizuna, beraz, ziurtatuta egongo da.
