Bitxore Laka artista ondarrutarra omenduko dute Ondarroan urriaren 3tik 12ra
“Azkenean ere, Bitxoreri egin behar genion egun bateko omenaldia aste osokoa bihurtu da”. Hitz horiekin jakinarazi dute ondarrutarrek ekainean zendu zen artista ondarrutarra omenduko dutela. Urriaren 3an hasi eta 12ra arte iraungo du omenaldiak. Omenaldia egiteko ekitaldia urriaren 11n, izango da, 19:00etan, Musika Plazan.
Egun horretan baita, margo eta buztin tailerrak (17:00etan) eta kalejira ere egongo dira (18:50ean, kaitik). Osterantzean, besteak beste, aste osoan, erakusketa, Bitxoren txokoak izeneko altxorraren bila jolasa, irratsaio berezia eta egun osoko irteera egingo dute herritarrek. “Jende ederra (eta famau!) batu izan gara omenaldia prestatzeko eta hauxe da emaitza”.
Ekintza horietaz guztietaz gain, herriko hiru ikastetxeetan girotze lanak egingo dituzte Bitxoreren inguruan. “Eta tartean, sorpresatxu batzuk ere izango dira kalean (baina horiek ez dizkizuegu kontatuko!)”.
Irteera urriaren 12an izango da. Herritarrak Urbasara joango dira, egun osorako. “Urederran beste bere errauts erdiak aireratuko dira”. Irteeran izena emateko epea urriaren 3an zabalduko da, erakusketa aretoan, urriaren 9ra arte. Autobuserako izena ematerakoan 20 euro ordaindu beharko dira (8 euro autobusa eta 12 euro menua).
