Berdintasun plana osatzen jarraituko dute bihar, Markina-Xemeinen
Bigarren saioa egingo da, 19:00etatik 21:00etara Uhagon kulturgunean.
Lehenego saioa ondo-ondo joan zela azaldu dute Berdintasun batzordeko kideek. “Adin tarte ezberdinetako herritarrek hartu zuten parte, eta Emakunderen ardatzen arabera beharrizanak antolatzen aritu ginen”, azaldu dute.
Bigarren saioan parte hartzea ere garrantzitsua dela azpimarratu dute Berdintasun batzordekoek: “Markina-Xemeinen egiten den lehenengo berdintasun plana da, eta herritar guztien iritzia jasotzea garrantzitsua da”.
Lehen saiora joan ez zirenak ere bigarrenera joateko aukera dutela argitu dute, gainera, zaintza zerbitzua eskainiko da.
Urte amaierarako eginda
Emakumeen eta gizonen arteko berdintasun erreala lortu eta sexuak eragindako diskriminazioa ezabatzeko asmoz lehen Berdintasunerako plana osatzen ari da Markina-Xemeingo Udala. Uda aurretik diagnostikoa osatu zen eta lehenengo zirriborroa prest dago. Orain herritarrek diagnostikoari ekarpenak egiten dabiltza, eta azaroaren amaierarako azken txostena prest edukitzea da udalaren asmoa. “Urte amaierarako Markina-Xemeingo I. Berdintasun Plana egotea da helburua”, aitatu dute.
