Zapatuan Bilbon eta Donostian egingo dituzten Lomce legearen kontrako kalejiretara joateko dei egin dute gure eskualdeetako udal, ikastetxe eta erakunde desberdinek.
Euskal Herrian gure hezkuntza eraiki, LOMCEri ez, inposizioei ez lelopean Bilbon, 17:30ean elkartuko dira Jesusen Bihotzean. Eta ordu berean, Donostiako Boulevarrean batuko dira herritarrak.
Hego Euskal Herriko lau hiriburuetako kalejirekin Espainiako Gobernuak ezarri duen Hezkuntza lege berriaren kontra daudela erakutsiko dute bertoko hezkuntza komunitateetako kideek.
Hezkuntza eredu propioa
Halaber, manifestazio horiek Euskal Herriko hezkuntza eredua eraikitzeko zereginean “abiapuntu” izatea gura dute deitzaileek. Gainera, bide horretan pausoak ematea erabaki dutela azaldu dute.
Erakunde desberdinek egin dute zapatuko ekitaldietara joateko deia: Hezkuntza Plataformen Topaguneak, Sortzenek, Ikasle Abertzaleak, Ikastolen elkarteak, ELA, LAB eta EILAS sindikatuek, UEUk, Hik Hasik…
Hain zuzen ere, eragile horietako asko aspalditik dabiltza “inposaketa” honen aurrean ekimen desberdinak antolatzen. Horren adibide dira
Gure Gida izeneko agiria eta Hezkuntza Plataformen Topaguneak biltzen dituen 40 bat plataforma. Lea-Artibain esaterako, eskualde mailako
Lea Artibai LOMCEri Ez Euskal Herrian Gure Hezkuntza plataforma sortu zuten, eta herriz herri ere sortu dituzte Lomce-ren kontrako plataformak, Aulestin, Etxebarrin, Markina-Xemeinen, eta Munitibarren, besteak beste.
Izan ere, iaztik, udalerri askotan egin dituzte LOMCEren inguruko berbaldiak edota mahai inguruak, herritarrei lege horren ondorioak zeintzuk diren azaltzeko. Era berean, Euskal Herriko makina bat udalerritan legez, berton ere Lomcerik Gabeko Herria direla alkarrikatu dute askok eta askok. Bertoko udalerrei dagokienez, hori egiten azkena Berriatua izan da. Irailaren 29ko udalbatzan onartu zuten
Berritxu Lomce gabeko herria mozioa.
Zapatuko kalejirara joateko deialdirekin batera, herri batzuetan ekitaldiak egingo dituzte asteburuan. Aulestin, adibidez, bariku iluntzean kontzentrazioa egingo dute plazan. 20:00etan elkartuko dira herritarrak. Aurretik, ekainean, legearen kontrako sinadura bilketa egin zuten, eta Lomcerik gabeko herria dela ere aldarrikatu zuten.
Bilbora joateko autobusa
Bestalde, zapatuan Bilbora joateko autobusa antolatu dute Ondarroako Zubi Zahar ikastolatik. Autobusa betetzeko gutxieneko kopurua egonez gero, 15:30ean irtengo da autobusa ikastolatik.
