Markina-Xemeingo Urriko Azoka Nagusiak 202 ganadu batuko ditu
Zapatuan ospatuko da Lea-Artibai eskualdean urtean antolatzen den abeltzain eta nekazal azoka garrantzitsuena, eta iaz baino partaidetza handiagogaz dator: Lea-Artibaiko 33 abeltzainek hartuko dute parte azokan.
Bertsolariek udaletxeko balkoitik botako duten pregoiagaz hasiko da aurten, azoka, eta 10:00etatik 17:00etara egongo da zabalik. Azokaren giroa herri guztira zabalduko bada ere, urtero modura bost gune nagusi izango ditu. Udaletxe osteko aparkalekuan eta alboetako berdeguneetan Bizkaiko Blonda Txapelketa eta eskualdeko abereen erakusketak egongo dira, plazabarripean baserri tresnak jarriko dituzte ikusgai, eta Zelaiaren inguruan egongo dira nekazaritza eta artisautza postuak.
Eskualdeko produktuak
Lea-Artibaiko barazkiak, frutak, Idiazabal gazta, eztia, baserriko ogia, baserriko gozoak, arrain kontserbak, sagardoa, txerrikiak, ahatekiak, txakolina eta barazki kontserbak aurkitu ahalko dituzte, besteak beste, azokazaleek Zelaiaren bueltan egongo diren 58 postuetan.
Guztira 35 dira euren produktuak zuzenean salduko dituzten ekoizleak. Horretaz gain, hamabost artisauk, sei baserri tresnen saltzailek eta zortzi elkartek ere jarriko dituzte euren produktu eta lanak erakusgai eta salgai: Koroideremiak eragindakoen elkarteak, Izarbidean elkarteak, Plazakola egoitzak, Gernikako Indaba elkarteak, Produkton Turismo bulegoak, MIBA kooperatibak, Zabaltzen-Sartu elkarteak eta Lea-Artibai eta Mutrikuko Hitzak.
Bestalde, eskualdeko abeltzainen 68 behi, lau idi, 40 zaldi eta 90 ardi egongo dira ikusgai animalien gunean, bai eta Euskal Herriko arrazetako beste hainbat abere ere. Iazko modura, soketan lotuta egongo dira animaliak, aparkalekuan.
Blond/Akitania txapelketa
Urtero legez, Blond/Akitania txapelketa egingo da; aurten Bizkaikoa, eta lau abeltzainek parte hartuko dute 67 burugaz: Markina-Xemeingo Ilaispe baserriko Ismael Arriolak, Arrietako Makuleta baserriko Jose Jesus Iturbek, Elorrioko Leaniz-Beaskoa baserriko Jose Balentin Beitiak eta Muxikako Goizko baserriko Itziar Uruburuk.
Sail bakoitzeko lehenengo hirurak izango dute saria, eta lehiaketako eme onenak, har onenak, ganadutegi onenak eta intseminazio artifizialeko produktu onenak sari berezia izango dute.
Herriko trikitilarien kalejirak eta bertsolariek girotuko dute azoka gunea. Pregoiagaz gain, bertso saioa ere eskainiko dute bertsolariek, eguerdian, udaletxeko balkoitik.
Gazteei begirako kanpaina
Urriko Azoka Nagusiaz gozatzeko gonbitea egin du Markina-Xemeingo Udalak, hala ere, jaietan izaten diren gehiagikeriak kontuan hartuta Alkoholik adingabekoei? Tantarik ez kontzientziazio-kanpaina izango dute abian azoka egunean. Hori dela eta, kartelak jarriko dituzte azoka gunean eta txosnetan «gaia bistaratzeko».
Azokako guneen mapa.
