Bizkaibuseko greba bertan behera geratu da, adostasunera ailegatu ostean
Gaur eguerdian [azaroak 4], Bizkaiko Foru Aldundiak eta Bizkaibusen ordezkaritza duten sindikatuek (UGT, ELA, CC.OO., LAB eta LSB-USO) berretsi egin dute joan den ostegunean lortutako akordioa; haren bidez amaiera ematen zaie bidaiarien errepide bidezko hiri arteko garraiorako zerbitzu publikoan urriaren hasieratik egin diren lanuzteei. 12:00ak pasata sinatu da akordioa, Aldundiko Garraioen Zuzendaritza Nagusiaren egoitzan.
Sindikatu guztiek —ELA, UGT, CCOO, LAB eta LSB— ontzat jo zuten eguenean lortutako akordioa. EAEko CCOOk jakitera eman duenez, akordioa «oso positiboa» da; izan ere, langileen eskaera gehienak jasotzen omen ditu. Bizkaiko Foru Aldundia ere «gustura» agertu da Bizkaibusen gatazkari amaiera emango dion akordioa lortu eta gero.
Oztopo teknikoak
Herri Lan eta Garraioen diputatu Itziar Garamendik azaldu duenez, arazoa ez zen borondate politikoa, oztopo teknikoak baizik. «Autobus-lineetan egin beharreko hobekuntzen zerrenda bat osatzearren egin da lan, eta, guztira bederatzi adostu dira. Guztiak ere, 2015eko apirilaren 15a baino lehen ezarriko dira. Baina ezinezkoa izan da hobekuntza horiek aurretik idatziz dokumentu batean jasotzea, denbora behar izan baita haiek diseinatzeko, eta horretarako lanean genbiltzan, sindikatuen inplikazioarekin edo barik». Gatazka ez dela lan-arlokoa izan berretsi du Aldundiak.
