Lazunarri islako mollaren edo malekoiaren gaur egungo egoerari eta baita epe laburrean hasiko diren konpoketa lanei buruzkoa izango da Lekeitioko EAJ-PNVk antolatutako hitzaldi – aurkezpena. Antonio Aiz Salazar Eusko Jaurlaritzako Garraio Sailburuak, Imanol Agote Alberro Kultura Ondarearen Zuzendariak, eta Almudena Ruiz de Angulo del Campo Garraio Azpiegituren Zuzendariak hartuko dute parte barikuan, 19:30ean, kultur etxeko azkue aretoan izango den ekitaldian.
Espainiako Gobernuko Kostaldeko Zuzendaritzarekin adostasun batera heldu ondoren, Eusko Jaurlaritzako Garraio Azpiegituren Zuzendaritzak, berehala hasiko ditu Lazunarri edo islako mollaren konpoketak lanak. “Eusko Jaurlaritzak lehen bai lehen hasi nahi ditu konpoketa obrak nahiz malekoi honen konpoketa Ministeritzak egin beharko luke, bere konpetentzia baita, baina 2012ko uztailaren 17an, Iñigo Urkullu lehendakariak, Lekeitiora bisita bat egin ondoren, eta islako mollako arazoa arrantzaleen ahotik entzun ondoren, konponbide bat aurkitzeko konpromezua hartu zuen, eta horrela egin du”, azaldu dute Lekeitioko EAJ-PNVkoek.
Egoera larrian
Islako moila XVIII. mendean hasi zen proiektatzen eta eraikitzen (1738. urte inguruan), baina, 275 urtetan bere eginkizuna bete ondoren, apurtuta dago. “2004. urtean hasi ziren lehen apurketak agertzen, eta horrela jarraitu du gaur egun daukan egoera penagarrira iritsi den arte”, azaldu dute EAJ-PNVkoek. Errekatik datozen jalkiak eta hondarra portuko sarrerako hondoan pilatzen ari dira, eta ondorioz, arrantza itsasontziek arazoak dituzte portutik sartu-irtena egiteko, horrek eragiten duen arriskuagaz. Lekeitioko arrantza-ontziak marearen arabera kalkulatu behar dituzte portuan sartzeko edo itsasora irteteko orduak. Lekeitioko EAJ-PNV-k azaldu duenez, lekeitiarrentzako porturatzea arazo bihurtu bada, are gehiago kanpotarrentzako eta Kofradiarentzako: “Itsasontziek ez baitute beraien arrantza hemen saltzen, Kofradiaren diru sarrerak murrizten dira, eta ondorioz, Lekeitioko herriarenak”.
“Azken urte hauetan, Lekeitioko EAJ-PNVkook, argi izan dugu konpoketa honen beharrizana eta derrigortasuna, eta horrela adierazi eta landu dugu erakunde ezberdinetan eta administrazio ezberdinekin, baina lan honetan ez gara bakarrik ibili, gurekin batera Lekeitioko San Pedro Kofradia eta Leakai elkartea izan ditugu”, adierazi dute.
