ETB2n ere Lea-Artibaiko herritarren testigantzak euskaraz jasotzeko eskatu dute eskualdeko eragileek
“Badirudi, gure herrietan eguneroko kontua dela euskaraz bezala gaztelaniaz ere aritzea, eta hori, ez da zuzena. Gainera, errealitatearen desitxuratze hori are sakonagoa bihurtzen da eskualde ez-euskaldunetako testigantzak gaztelania hutsez jaso eta aireratzen direnean. Jokamolde hori oinarri hartuta, komunikabide hauek inplizituki ematen duten mezua honakoa da: Euskal Herriko eskualde batzuetan gaztelaniaz bakarrik hitz egiten da, eta gainerakoetan euskaraz zein gaztelaniaz”. Irakurketa horren aurrean, eragileek eskualdean bizi den egoera ez dela hori gaineratu dute. “Gure herrietan, oro har, gehiengo zabala euskara hutsean bizi da”. Bide beretik, ETB2n eskualdeko euskara entzutea aberasgarria dela diote, “ikasten dabiltzanentzat batik bat.
Egitasmoa Lea-Artibain sortu bazen ere, Urola Kosta Euskal Herri mailan bigarren eskualde euskaldunena izanik, hango eragileek ere egitasmoarekin bat egin zuten. Horrela ba, bi eskualdeek elkarlanean egin dute eskaera; EiTBko arduradunekin egindako bileran bi eskualdeetako ordezkariak egon ziren.
EiTBko arduradunek, beste alde batetik, eskaera horrein gainean pausoak ematen jarraitzeko asmoa erakutsi zutela argitu dute; “barruan berba egiteko geratu ziren”.
Lea-Artibai eta Urola Kosta euskararen arnasgune diren heinean, “gainontzekoentzat eredu” izan behar dutela nabarmendu dute. Bide horretatik, ekimena gutxinaka-gutxinaka elkarte eta herritarrengana zabaltzen joango dela gaineratu dute.
