3 urteko kartzela zigorra ezarri dio Auzitegi Nazionalak Aingeru Cardañori

Izaro Mendieta

2014/11/20

Munitibarren Aingeru Cardañori babesa adierazteko egindako elkarretaratzea, 2011. urtean

2001eko gertakaria izanik, 2014ko amaieran epaitu izanagatik jaitsi dio epaileak bost urtetik hiru urtera arteko zigorra. Munitibarko bizilagunak ez du ustekabean hartu epailearen erabakia; izan ere, bere arabera, “urte asko dira Auzitegi Nazionalak euskaldunak epaitzen dituena, eta jakin badakigu ez dagoela bermerik bertan”. Beste hainbat presogaz gertatu ohi den bezala, “beste kondena” bat bezala hartu du Munitibarkoak. Hala ere, Angela Murillo epailearen erabaki hori oraindik irmoa ez dela azaldu du Cardañok; izan ere, defentsak hamar egun baliodun ditu helegitea aurkezteko. Gauzak horrela, Auzitegi Gorenera jotzeko asmoa erakutsi du Lea-Artibaiko bizilagunak. Inozentzia erakustea, oso zaila Azken horregaz, ez du beste kondenarik Cardañok; hala ere, behin zigor hori gaindituta, berriro ere espetxeratuko ez dutenaren bermerik ez duela dio; “2003ko atxiloketaren ostean etorri ziren kondenak. Inkomunikatuta izan eta torturatu ostean, deklarazio polizial batzuk bildu zituzten, eta hortik atera zituzten zenbait epaiketa, orain leporatzen dizkigutenak. Beraz, printzipioz, bukatuta izan beharko nituzke epaiketak, baina, auskalo”. Hamar urte lehenago ustez egindako ekintza bategatik atxilotzen ari dira gaur egun euskal preso politikoak, Cardañoren arabera, eta, horren aurrean, euskal herritarrak babesgabe aurkitzen direla deritzo; izan ere, “hainbeste urte igaro eta gero, zaila da orduko egun hartan non zeunden frogatzea”. Horregatik uste du euskal herritarren inozentzia erakustea oso zaila dela. Espetxera joatea ez dela gauza erosoa badaki Munitibarren bizi den gazteak, baina, bere testuinguruan hartu behar dela dio: “Alegia, ez naiz espetxean egongo den bakarra, 500 preso politiko daude, eta ni, ni beste bat izango naiz”. Borroka kolektiboa dela argi du, bera bezala, beste hainbatek pairatzen baitute “egoera oso latza”. Halaber, presoek ez ezik, beraien senide eta lagunek ere bizi ohi dute, Cardañoren arabera, egoera latz hori. Hala, presoa kartzelan izateak suposatzen dituen ondorioen jabe dira azken horiek; bidaiatu egin behar izaten dute, gastuak ere handiak izaten dira… Esperantzetan baina errealista Egoera horren aurrean, hala ere, esperantza baduela aitortu du Munitibarkoak; bere ustez, borroka egiten duen orok izaten baitu esperantza. Era berean, dena den, “errealista” dela dio: “errealitatea zein den badakit: euskaldunak kondenatzen jarraitzen dute, eta, gainera, zigor gogorrekin kondenatzen dituzte”. Azken urte horietako ibilbidean, Munitibarko herritarrak bidelagun izan dituela badaki, behintzat, Cardañok. Jaiotzez bertakoa izan ez arren, “erabateko babesa” jaso duela azaldu du: idazteagaz, elkarretaratzeak eginaz, espetxera bisitak eginez, epaiketetara bertaratuz… “Hori ezin da ordaindu, hori sentitu egin behar da”, dio. “Oso gauza handia da, eta, horregatik, zorretan egongo naiz Munitibarko herriagaz hemendik eta hil arte”.

3 urteko kartzela zigorra ezarri dio Auzitegi Nazionalak Aingeru Cardañori

Bizkaia

Artxibatu egin dute Voxek Santurtzin egindako ekitaldian atxilotu zuten emakumearen kontrako auzia

Aburtok berretsi du Bilboko alkatetza uzteko erabakia ez zela berea izan, EAJrena baizik

Urrian hasiko dira Vecunia herrixka indigenaren bila Begoñako basilikan

Animalien historia ibiltaria

Hegoaldeko tren saihesbidea lurperatzeko edo herrigunetik ateratzeko eskatu dute Arrigorriagan

Barakaldo Naturalak «hipokritatzat» jo du EAJ, Espainiako Gobernuari tren saihesbidearen kalteak arintzeko plan bat eskatzeagatik

Greenpeacek hamabost toki kritiko identifikatu ditu Bizkaiko eta Gipuzkoako kostaldean

Itaiak salatu du mutil talde batek Arrigorriaga inguruko nesken «irudi sexualizatuak» zabaltzen zituela

Paellez jositako Aixerrota

Bizkaitarrek aurreko kanpainan baino 58,6 milioi gehiago jaso dituzte etxebizitzari dagozkion kenkarietan

Palestinaren alde egiteagatik Bizkaian gutxienez 24 isun jaso dituztela salatu dute

Hegoaldeko tren saihesbideak Arabako eta Bizkaiko udalerrietan izango duen eragina arintzeko jarduera plan bat eskatu du EAJk

Absolbitu egin dituzte Berangoko ongietorriagatik auzipetutako guztiak

Leioako udalbatzak ez du onartu asto probak herriko jaietatik kentzea