Euskararik onena "egiten dena" dela aldarrikatu dute Euskararen Egunean
Ez dakitenek ikasten ez dutelako baino dakitenek hitz egiten ez dutelako galtzen dira hizkuntzak. Eta gaur hori azpimarratu dute Lea-Artibain eta Mutrikun. Goizean goizerako balkoi, leiho zein saltokietan Euskaraz bizi nahi dut aldarria daramaten bandera beltzak ikus zitezkeen herriz herri. Ikastetxeetan ere hainbat ekintzatan murgildu dira lehen ordurako.
Eta 10:00etan, Ondarroan, Zubi Zahar herri ikastolak antolatuta, Argitxo zuekin kalejira hasi da Kamiñazpin: parke ondoan abestu dute ikasleek, eta ondoren, kalejiran atera dira. Argitxo iratxoa lagun. Badi´s aurreko plazan, Kalekutzeko eskaileretan eta Alamedan abestu dituzte euskararen erabilera aldarrikatzeko kantak. LH6ko ikasleek esketxak egin dituzte ondoren. Hobeto ala gaizkiago egin, garrantzitsuena euskaraz egitea dela, horixe adierazi dute, herritarren txalo eta irribar artean.
Arratsaldean, danborrada egin da Ondarroan bertan, Zaldupe eskola publikoko Hondar Ahua guraso elkarteak antolatuta. 18:00etan ateradira Zaldupetik herritarrak. Ekitaldi hori jendetsua eta arrakastatsua izan da oso. Estreinako egin da eta jai giroan egin da kalejira, euskararen aldeko aldarriekin.
Euskararen Egunerako antolatutako ekitaldiek, dena dela, ez dute etenik izango. Datozen egunetan beste hainbat ekintza egingo dituzte herririk herri.
[nggallery ID=211]
