Torturak jasan dituzten pertsonen testigantzak jasotzen dituen dokumentala proiektatuko dute Markina-Xemeinen
Bihar, 19:00etan, Voces. Detencion y tortura en el Pais Vasco dokumentala emango dute Markina-Xemeingo kultur aretoan.
20 minutu inguru dituen dokumentalaren emanaldiaren ostean, Iñaki Goioaga senatariak solasaldia eskainiko du.
Iluntzean proiektatuko duten dokumentalak torturak jasan eta inkomunikazioan egon diren herritarren testigantzak jaso ditu. Ahotsak elkarteak lau urtean egindako beharra erakusten du, besteak beste. Denbora tarte horretan, Euskal Herriko 45 pertsonaren testigantzak jaso dituzte, tartean, eskualdeko jendearenak ere bai. 1982 eta 2010 urteen artean estatu espainiarreko hainbat indar poliziaren eskuetan jasotako torturen berri ematen dute.
Hala eta guztiz ere, dokumentalean ez dira pertsona horiek guztiak ikusten. Hain zuzen ere, 11 pertsonen zuzeneko gertaerak entzun daitezke. Dokumentalean jaso diren testigantza guzti horiek, Istanbuleko protokoloari jarraituz, 30 profesionalek aztertu dituzte.
