Urkaregi errekak Erbera kalean eragiten duen uholde arriskua saihestea da Etxebarriko Udalaren eta Uraren Euskal Agentziaren akorduari esker aurrera eramango diren lanen helburua.
“Arrisku handiko erreka da, eta urak hartzeko arriskua ekidin egingo da proiektu honegaz. Bestalde horrek, eskolak egiteko proiektua dagoen lursailaren birkalifikazioa egin eta behin edo behin eskolak lur horretan kolokatzeko aukera emango digu”, azaldu du Etxebarriko alkateak.
Udalarentzako obra guzti hori karga handia izango litzatekela ere adierazi du Iriondok, eta eskerrak ematen dio URA agentziari bere parte hartzeagatik.
Uholde arriskuak kudeatzeko plangintza
Uraren Euskal Agentziako zuzendari nagusiak azaldu duenez, Uholde arriskuak kudeatzeko plangintza bat zehazten dabil URA Euskal Ur Agentzia azken hiru urteetan, eta plan horrek 2015eko abendurako amaituta egon behar du. Planaren aurkezpena 2014ko abenduaren 30ean egin zuten eta momentu honetan erakusgai daude. Hasteko, arrisku gehien zuten guneak identifikatu zituzten. “Batez be pertsonengan eta gero ondasunen gainean eragina eduki ahal duten 100 uholde gune identifikatu ziren”, zehaztu du. 100 gune horien barruan kokatzen da bai eta Etxebarria.
“Udalak berak aspaldi eskatu zigun uholdegarritasun hori jaisteko premia zeukala, eta guretzako ere lehentasunezko obra bat da hori”, azpimarratu du URA agentziako zuzendariak.
Etxebarriko Udalak eramango du aurrera lanen proiektua, eta URAk diruz lagunduko dio. Horrela, Uraren agentziak lanen %60a ordainduko du eta Etxebarriko Udalak beste %40a.
Obra bi zatitan banatuko da. Lehenengo fasean, Etxebarritik Elgoibarrera bidean dagoen azken bihurgunean dagoen zubia botako dute. Uraldiak daudenean oztopo handia dela ikusten dute, eta beraz, ahalmen hidrauliko handiagoa duen beste bat jarriko dute haren ordez. Obra zati horrek, 267 mila euroko kostua izango du.
Bigarren fasean, erreka ingurumen aldetik leheneratuko da. Horretarako ubideratze horma eraitsi egingo dute eta ezponda egonkor bat hondeatuo da. Lan horrek 85 mila euroko kostua edukiko dute.
“Zubia zabalduta eta errekaren leheneratzea eginda ura bere bidetik joango da”, azpimarratu du alkateak.
Obrak egiteko agiriak onartuko dituzte orain, eta lanak otsailaren 26an emango dira. Martiaren hasieran hasiko dituzte lanak.
