Iazko zaldi-mando probetako irabazlea: Mikel Garaialde
Hogeita hamargarrenez, Kintxopeko zaldi-mando probak hartuko ditu Ispasterrek. Hiru egunetan banatuta, 11 zaldik parte hartuko dute barikuan hasi eta domekara bitartean. Hainbat izaten dira urtero-urtero Ispasterko probalekuan biltzen diren herritarrak.
Barikuan eta zapatuan 21:00etan hasiko dituzte probok eta, domekan, berriz, 18:00etan. Lehenengo eta bigarren egunean launa zaldiren arteko norgehiagoka izango dute aukeran Ispasterko probalekura bertaratzen diren herritarrek, eta, hirugarren eta azken egunean, berriz, hiru zaldirena.
Parte hartzaile guztiek Ispasterko harria erabili behar izango dute proban, eta abereen oinarrizko pisua 400 kilokoa izango da. Ispasterko Udalak jakinarazi duenez, pisaketa saioa baino ordubete lehenago egin behar izango dute bertan parte hartzen dutenek.
Hamar sari nagusi
11 zaldirentzako 10 sari nagusi egongo dira asteburuko proba horietan. Untza gehien egitea lortzen duenak 750 euro jasoko ditu dirutan, eta, horrez gain, manta eta txapela ere eskuratuko ditu. Saririk jasotzen ez duen parte hartzaileak, gainera, irabazlearen markaren %70a egiten badu, 300 euro jasoko dituela jakinarazi du Ispasterko Udalak.
Iaz, Mikel Garaialde nagusi
Iazko zaldi-mando probetan Mikel Garaialderen Urnietako zaldia nagusitu zen, 76 untza, 3/4, hiru metro eta 35 zentimetro egin ostean. Itziarko Etxeberrik egin zuen bigarren, eta Etxebarriako Beide Anaiakek, aldiz, hirugarren. Horretan ere, 11 zaldi aritu ziren lehian lau egunetan zehar.
ZALDI MANDO-PROBAK
Parte hartzaileak
Otsailak 13, barikua, 21:00etan. Patxua Taberna (Markina-Xemein), Motrollo (Munitibar), Jose Angel Lopez (Laudio) eta Txutxi Larrazabal (Laudio).
Otsailak 14, zapatua, 21:00etan. Taberna Goieta (Mungia), Andoni Mendizabal (Asteasu), Baraiazarra (Maume) eta Aterpe (Mallabia).
Otsailak 15, domeka, 18:00etan. Berroeta (Ezkio-Itxaso), Imanol (Hernani) eta Koba (Aulesti).
Sariak
1. saria. 750 euro, manta eta txapela.
2. saria. 650 euro.
3. saria. 575 euro.
4. saria. 525 euro.
5. saria. 500 euro.
6. saria. 475 euro.
7. saria. 450 euro.
8. saria. 425 euro.
9. saria. 400 euro.
10. saria. 350 euro.
