Angel Toñaren kargu hartzea

Lea-Artibai eta Mutriku

2015/02/10

Angel Toña ondarrutarrak sailburu kargua hartu du

Ezkerretik eskumara, Angel Toña, Iñigo Urkullu eta Juan Maria Aburto. Argazkia: Jon Bernardez/Lehendakaritza

Gaur [otsailak 10] goizean, Angel Toña Guenagak Iñigo Urkullu lehendakariaren aurrean Enplegu eta Gizarte Politiketako sailburu kargua zin egin du Ajuria Enean. Ekitaldian Eusko Jaurlaritzako sailburu guztiek parte hartu dute. Han izan dira: Josu Erkoreka Herri Administrazio eta Justiziako sailburua eta Gobernuaren bozeramailea, Arantxa Tapia Ekonomiaren Garapen eta Lehiakortasuneko sailburua, Ricardo Gatzagaetxebarria Ogasun eta Finantzetako sailburua, Cristina Uriarte Hezkuntza, Hizkuntza Politika eta Kulturako sailburua, Estefania Beltran de Heredia Segurtasuneko sailburua, Jon Darpon Osasuneko sailbura, Ana Oregi Ingurumen eta Lurralde Politikako sailburua eta Juan Maria Aburto, orain arte Enplegu eta Gizarte Politiketako sailburua izan dena. Lehendakariak sailburu berria izendatzeko Dekretua irakurri du. “Angel Toña Guenaga jauna, haren merezimenduak eta dohainak kontutan izanik, Enplegu eta Gizarte Politiketako sailburu izendatzen dut. Herritar eta agintari guztiei agintzen diet bete ditzatela sailburuak legediaren araberako funtzioak baliatuz ematen dituen aginduak. Beti ere, pertsona eta agintari legez dagokion begirunea erakutsita”.

Angel Toña sailburu karguari zin egiten. Argazkia: Jon Bernardez/Lehendakaritza

Ondoren, ondarrutarrak karguari zin egin dio, lehendakaria buru zela, Eusko Legebiltzarreko presidentearen eta Mahaiko kideen, Eusko Jaurlaritzako sailburuen eta orain arte sailburu izan zen Juan Maria Aburtoren aurrean. Ekitaldia Gernikako Estatutuaren aurrean izan da eta Angel Toñak ondorengo berbekin hartu du kargua: “Hartzen dudan agintea Euskadiren zerbitzuan eta legearen arabera zintzo eta leialki erabiliko dudala hitz ematen dut”. Kargua zin egin ostean, Urkulluri eskua eman dio eta Aburtori besarkada handi bat. Era berean, Juan Maria Aburtori “bi urte luze hauetan egindako lana” eskertu eta izan duen jarrera azpimarratu ditu lehendakariak. “Zure taldearekin batera Enplegu eta Gizarte Politiken alde dena eman duzu garai zail hauetan. Elkarlanean aritu gara pertsona helburu konpromisoa betetzeko, eta aurrerantzean ere, bide honetan jarraituko dugu”.

Angel Toña sailburu berriari “hartutako konpromisoa, prestutasuna eta borondatea” eskertu nahi izan dio Iñigo Urkullu lehendakariak

Horrez gain, Angel Toña sailburu berriari “hartutako konpromisoa, prestutasuna eta borondatea” eskertu nahi izan dizkio Urkulluk. “Eskerrik asko Angel Toña, erronka honi baiezko batekin erantzuteagatik. Gure eskaera onartu egin duzu bidean aurrera egiten jarraitzeko. Gure herriaren aldeko gogoa indartu egiten du. Zure ezagutza eta esperientzia ezagunak dira, orain zure gogoa gehintzen diogu Jaurlaritzari. Elkarrekin gaude eta elkarlanean jarraitu behar dugu enplegua sustatzen eta gizarte politikak babesten eta hobetzen”. Angel Toña sailburuak, berriz, lehendakariari beragan jarri duen konfiantza eskertu dio. Bere eginkizuna “ardura handiz” hartu duela adierazi du, eta “herritarren beharrei erantzuteko” bere esku dagoen guztia egiteko konpromisoa duela.

Ekitaldi nagusia amaitu ostean, behin Gobernu Kontseiluak osaketa berria eginda, bilera egin dute Lehendakaritzan.

Angel Toñaren ibilbidea

Ekonomia eta Enpresa Zientzietako doktore da Deustuko Unibertsitatean, eta bertan ari da irakasle 1978tik. Gaur egun, Etika Zibikoa, Profesionala eta Enpresaren Etika irakasten du Ekonomia eta Enpresa Zientzien Fakultatean (Deusto Bussines School); eta Enpresa Etika eta Gizarte Erantzukizuna, Giza Baliabideen Masterrean. 2002 eta 2004 artean, Zientzia Politiko eta Soziologia dekanoa izan zen eta Gizarte Ikerketaren zuzendaria Deustu Fundazioan (2004-2006). Alor pribatuko ibilbideaz gain, Eusko Jaurlaritzaren Lan sailburuordea (1991) eta Enplegu zuzendaria (1980) ere izan zen. 1990etik orain arte, Lan Harremanen Kontseiluko bitartekari eta bateratzailea da lan gatazka kolektiboetan; administratzaile judiziala ere bada hainbat konkurtso‑prozeduretan 2001etik.