Bere herrian jokatuko du Munitibarko Aitor Irusta pilotariak bihar
Azken hamar bat urtean herrian egon ez den ikuskizunagaz gozatzeko aukera izango dute munitibartarrek; izan ere, profesional mailako eskuz binakako partiduak hartuko ditu Lea-Artibaiko herri horrek bihar. Duela zenbait urte jaialdi hori hartzen zuen Munitibarrek, hala gogoratzen du bertako pelotari Aitor Irustak. Hala ere, azken urteetan ez dela halakorik antolatu gogorarazi du, eta, horregatik, «oso pozik» da berau antolatu izan dutelako. Ez du ezer jokoan izango Irustak, baina jaialdiaren parte, behintzat, izango da.
Hain zuzen, lehen mailako Retegi II-k eta Rezustak osatutako bikoteak Ezkurdia eta Zabaletaren aurka jokatu beharko dute bihar Munitibarko frontoian. Horien aurretik, baina, Jaunarena-Merino eta Altuna III-Irusta bikoteen partida hartuko dute pelotazaleek gustu handiz Munitibarko frontoian, 17:00etatik aurrera.
Irustaren ilusioetako bat
Lea Ibarra Motrollo Pelota Elkarteak antolatu du gaurko eskupilota jaialdia, eta elkarte horri eta Unai Iglesias eskupilotako entrenatzaileari eskerrak eman beharrean agertu da Munitibarko Irusta pilotaria; izan ere, horiei esker, bere «ilusioetako bat» betetzea lortuko dute; profesional modura bere herrian jokatzea, hain zuzen ere.
Etxean jolastegaz pozik izango da munitibartarra, bertan izango baititu bere lagun eta familiakoak. Beraz, gozatzeko asmoz aterako da bere herriko frontoira; horregaz batera, dena den, ahalik eta partida onena egiten saiatuko dela aitortu du, «ea horrela irabazteko aukerarik dagoen».
Lehen mailako txapelketako azken partidak irabaztea lortu du Irustak, eta bolada on horrrekin jarraitzea izango da bere helburua. «Hobeto entrenatzen eta ondo jokatzen» dagoela azaldu du, eta, horri esker irabazten hasteko unea iritsi zaiola gaineratu du; hala, «ahalik eta denbora luzeenean horrela jarraitzeko» lanean segituko du.
