Euskal Herriko Mus Txapelketako finala, Lekeition

Amoroto,Gizaburuaga,Ispaster,Lekeitio,Markina-Xemein

2015/03/06

Ondarroan jokatutako EH Mus Txapelketako kanporaketa.

Euskal Herri osoko zazpi herrialdeetako 128 muslari onenak lehiatuko dute bihar, Lekeition jokatuko den Euskal Herriko Mus Txapelketako final nazionala. Azarotik urtarrilera 250 herri baino gehiagotan jokatu ziren kanporaketak, eta Euskal Herri osoko 2.000 bikote inguruk parte hartu zuten. Otsailaren 21ean egin ziren herrialdeetako kanporaketak, eta bertan sailkatutako muslari onenek izango dute bihar, eskura, Euskal Herriko txapela. Goizean goizetik hasiko da martxan, Lekeitioko txapelketa. 09:00etarako aurkeztu beharko dira muslariak Independentzia plazan, eta izena emateagaz batera kafe goxoa izango dutela zain jakitera eman dute antolatzaileek. Izena eman da gero, aurkezpena egin, eta Aittitta Makurra taldeko txistulariek gidatutako kalejiran Merkatu Plazara abiatuko dira mus jokalariak. Ligaxka 10:00etan hasiko dute norgehiagoka. Taldeka banatuta, ligaxka jokatuko dute goizean, denek denen aurka. Zeregin horretarako Euskal Herriko Mus Federazioak ahalik eta talde anitzenak osatuko dituela azaldu du: «Talde bakoitzean herrialde ezberdinetako muslariak egongo dira». 11:30ean, hamaiketakoagaz gozatzeko, Lekeitioko zazpi taberna eta jatetxek egindako pintxo jana izango dute muslariek, eta bigarren faseari ekingo zaio. «Talde bakoitzeko garaileak elkarren artean lehiatuko dira, irabaztea lortzen duenak aurrera jarraituko du», zehaztu dute.

Mus txapelketa jokatu bitartean, Itxaropena txistulariek herriko giroa alaituko dute herrian zehar egingo duten kalejiragaz.

Bertan Merkatu Plazan bazkalduko dute jokalariek, eguerdian. Bazkaria, iparraldeko Kuxkuxtu txarangak girotuko du, eta bazkalondoan Euskal Herriko abestiez gozatzeko aukera paregabea egongo da. Bai eta Mahaigaineko dantzagaz ere. Arratsaldeko norgehiagokarako sailkatuko diren hamasei bikoteak mahaitik altzatu orduko egingo dute Mahaigainekoa. Manu Ziluagak txistua joko du eta Txilibristak dantzan egingo dute. «Herrialde ezberdinetatik datozenei bertoko kultura ezagutzera ematea da helburua», azaldu du Jose Miguel Meabe Lekeition txapelketa antolatzen duten Aittitta Txikiko arduradunak. Euskal Herriko Mus Txapelketako finala, Barandiaran aretoan jokatuko da. 17:00etan, kalejira egingo da Merkatu Plazatik Independentzia plazara Kuxkuxtxu txarangaren doinuekin, kalejiran. Bertan plazan emango dituzte sariak. Beraz, arratsaldeko azken orduan, aurtengo Euskal Herriko Txapeldunak zeintzuk diren jakingo da. Bertoko sei bikote Lea-Artibai eta Busturialdeko sei bikotek hartuko dute parte final nagusian. Maila ona erakutsi zuten Bizkaiko finalean, eta sari nagusia lortzeko ahalegina egingo dute bihar. Bedaronako Luis Angel Aboitiz eta Aitor Okamika, Bizkaiko txapeldunak, Ispasterko Jon Galletebeitia eta Iñaki Arriaga, Amorotoko Jabi Agirre eta Ander Elordi, Gizaburuagako Luis Anakabe eta Jabier Urrutiabeaskoa, Markina-Xemeingo Juani Gallastegi eta Txomin Biteri eta Lekeitioko Efo eta Jamhy jarriko dira Merkatu Plazako mahaietan.