Batez ere gazteei begira antolatu dute aurton TELP tailerra
Bermeoko Udalak eta Bermeoko Gazte Asanbladak antolatuta, TELP tailerra eskainiko dute martxoaren 14an eta 28an. Goiko Plazako Kabidxe gune sozialean batuko dira zapatu bi horietan, 09:00etatik 14:00etara. Aurten, aipatu tailerra bereziki gazteei zuzen...
Maite Alvarez de Zarate udaleko euskara teknikariak azaldutakoaren arabera, TELP tailerraren helburua euskaraz berba egiten denean zenbait aldiz sortzen diren egoeren aurrean eta izaten diren erantzun desegokien aurrean zelan jokatu aztertzea da.
Tailer horretan, modu praktiko batean, egoera deserosoen aurrean hobeto sentitzen erakusteko baliabideak eskaintzen dizkiete parte hartzaileei: «Zenbat bider gertatu zaigu elkarrizketa bat euskaraz egin gura eta gaztelaniaz berbetan amaitzea? Holakoetan zer pentsatu, zer esan eta zer egin erakusten du TELP tailerrak». Hala, parte hartzaileek jarrera kontzienteak maila kognitiboan eta komunikatiboan landuko dituzte, eta zenbait estrategia ere landuko dituzte, sentsibilizazioa areagotzeko.
Parte hartu gura duten gazteek ezinbestekoa izango dute aurretiaz izena ematea. Bermeoko Gazte Asanbladaren Facebookean edota udaleko euskara sailean eman beharko dute izena, eta bihar dute horretarako azkenengo eguna.
Antolatzaileek jakinarazi dutenez, gehienez, hogei lagunek parte hartu ahal izango dute tailerrean.