Lekeitioko Lotu oinetako dendako erakusleihoa apainduta. Argazkia: Lea Artibai Garapen Agentzia
Azken urteetako ildoari jarraituz, Leartibai Garapen Agentziak Lea-Artibaiko VIII. Erakusleiho Lehiaketa jarri du martxan.
Udaberria Lea-Artibain leloa kontutan hartuta, lehiaketan parte hartu nahi dutenek, beraien erakusleihoak gai honen inguruan apaindu beharko dituzte.
Izena emateko epea bihar hasi eta martxoaren 30era artekoa izango da, eta erakusleihoen erakusketaldia, berriz, apirilaren 1etik 15era bitartean.
Apainketa proiektu bakoitza Udaberria Lea-Artibain kontzeptuan oinarritzeagaz gain, beste irizpide batzuk ere kontutan hartu beharko dituzte lehiaketako parte hartzaileek apainketa egiterakoan: Produktua merkaturatzeko egokitasuna eta produktuaren aurkezpena, sormena, modernitatea eta berrikuntza, argiztapena eta irudi komertziala.
Iazko epaimahai bera
Pasa den urteko edizioan bezala, aurten ere epaimahaia Esti Olasolo diseinatzaileak, Fran Urdiki dekoratzaileak eta Leartibai Garapen Agentziako teknikari bik osatuko dute. Gainera, 2014an berrikuntza moduan sartu zen herritarren bozka ere mantenduko da, hortaz, herritarrek dendetan jarriko diren kutxetan, zein www.leartibai.com webgunean eman ahal izango diote erakusleiho onenari beraien bozka.
Lehiaketan parte hartu nahi dutenek, Leartibai Garapen Agentziagaz kontaktuan jarri behar dira. Horretarako hiru bide izango dituzte aukeran: 94- 683 34 95 telefono zenbakira deitzea,
blarrinaga@leartibai.com edo
merkataritza@leartibai.com helbide elektronikoetara idaztea edo Lekeitio, Markina-Xemein edo Ondarroan dauden bulegoetara hurbiltzea.
Sariak
- Eskualdeko lehen saria: 300 euro.
- Eskualdeko bigarren saria: 200 euro.
- Sormen saria: 300 euro.
- Bonoak: 50 euroko bi bono ere zozketatuko dituzte saltokietan eta web atarian bozka ematen duten herritarren artean (lehiaketan parte hartzen duten saltokietan gastatzeko).
