04/08 sumarioko epaiketa azaroaren 12an hasiko da

2015/04/14

Atzerapen ugari eduki ostean, Segurako operazioan atxilotutako ezker abertzaleko 35 kideren aurkako epaiketa azaroaren 12an hasiko dela ematen du. Espainiako Auzitegi Nazionalak atzo [apirilak 13] eman zuen erabakiaren berri. Martxoan, urriaren 13a ipini zen epaiketa hasteko eguna, baina orain agenda guztiak bat etorri eta gero, beste hilabete atzeratu da.

Mikel Etxaburu urtarrilaren 12ko epaiketara irten aurreko uneetan adierazpenak egiten

Orain jarritako datak betetzen baldin badira hamabost saioren ostean, abenduaren 16an amaituko da epaiketa. Auzipetuentzat, tartean Mikel Etxaburu Osa ondarrutarrari, sei eta hamar urteko kartzela zigorrak eskatzen ditu fiskaltzak. Guztiei erakunde armatu baten parte izatea leporatzen diete.

Hasierako egunetik etenda

Urtarrilaren 12an hasi behar zuen 04/08 sumariopean auzipeturikoen aurkako ahozko saioak, baina, epaiketa hasi baino hiru ordu lehenago, defentsan ari ziren Haizea Ziluaga, Amaia Izko eta Eukene Jauregi abokatuak atxilotu egin zituzten, Madrilen bertan. 35 auzipetuek atzeratzea eskatu zuten, eta orduan, etenda gelditu zen auzi saioa. Harrezkero, hainbat bidar atzeratu da epaiketaren hasiera. Urtarrilaren 12an epaiketa atzeratu eta hiru abokatuak libre utzi ostean, auzitegiak epaiketa urtarrilaren 29ra atzeratzea adostu zuen, baina hura ere bezperan atzeratu egin behar izan zen Haizea Ziluagak ordezkatzen zituen sei auzipeturen defentsari uko egin eta gero.