Jose Maria Arizmendiarrieta. Argazkia: arizmendiarrieta.org
On Jose Maria
Arizmendiarrietaren jaiotzaren mendeurrenaren harira, hainbat ekintza egingo ditu Markina-Xemeingo Lea Artibai ikastetxeak. Bihar, apirilak 15, 18:00etan, D. Julian Olazabalagaren omenez oroigarria jarriko da ikastetxeko sarrera nagusian. Ondoren, 19:00etan, D. Jose Maria Arizmendiarrietari buruzko HEMEN aldizkariaren aurkezpena egingo da Esperantza eraikineko enpresa aretoan:
Arizmendiarrieta. Gaurko begiradak.
Domekarako ere, apirilak 19, ekitaldi berezia prestatu dute. 11:00etan D. Jose Maria Arizmendiarrietaren omenezko meza ospatuko da Xemeingo elizan. Meza Bizkaiko gotzain Mario Icetak emango du, eta Xemein abesbatzak abestuko du bertan.
12:15ean, Barinagako San Pedro elizan emango du meza gotzainak, eta meza ostean, 13:00etan, D. Jose Mariaren omenezko ekitaldia egingo da Barinagan.
Markina-Xemeindik Barinagara joateko autobusak egongo direla jakitera eman dute antolatzaileek.
Santu izateko bidean
Arrasateko Kooperatiben Mugimenduaren sortzailea, apaiz eta pentsalari bikaina izan zen Jose Maria Arizmendiarrieta. Markina-Xemeingo Barinaga auzoko Iturbe baserrian jaio zen 1915eko apirilaren 22an eta 1976ko azaroaren 29an hil zen. Enpresaren kudeaketari buruzko kontzepzio aurrerakoi eta ausart baten bitartez Arizmendiarrietak eta bere giza taldeak abian jarri zuten industria azpiegitura garrantzitsua, mundu osora zabaldu dena.
Barinagako apaizaren ibilbidea eta izaera kontuan hartuta, Arizmendiarrieta kanonizatzeko prozesua jarri zuten abian, 2006an talde sustatzaile batek, eta Arizmendiarrietaren jaiotzaren mendeurrenagaz bat eginez, kanonizatzea aurten izatea espero du Eskatzaile Batzordeak. Aukerak egon badaude, izan ere, bederatzi teologok osatutako talde batek erabateko adostasunarekin onartu berri du ideia eta Frantzisko aita santuak aurten bertan hartu dezake bere izendapena “beneragarri” modura.
Arizmendiarrietaren kanonizazio prozesua ikertu duen teologo taldearen erabakia kardinalen komisiora joango da orain, eta Kardinalek teologoen erabakia babesten badute, aita santuaren aurrean aurkeztuko dute. Santuak izendatzeko ardura aita santuak berak dauka.
