Urteroko giro ona espero dute Boga! mendi martxaren antolatzaileek
Aurrera Mendi Taldeak eta Zubi Zahar herri ikastolak antolatuta, domekan [apirilak 26] bosgarrenez egingo da Boga! mendi martxa, eta aurrekoetan gertatu modura, aurten ere, giro onean batuko den jende asko espero da. Beti bezala, Ondarroa inguruko paisaiak eta toki bereziak ezagutzeko aukera izango dute bertan parte hartzen dutenek.
Izena emateko epea barikura [apirilak 26] arte irekita badago ere, aurten ere jende asko batzea espero dute antolatzaileek. “Iaz 700 pertsona inguru batu ziren, eta aurten ere antzera ibiliko garela uste dugu. Momentuz, 200 eskaera inguru jaso ditugu Interneten, baina esperientziaren arabera, jende gehienak azken momentura arte itxaroten du”.
Aurretiaz izena eman nahi dutenek Aurrera Mendi Taldearen web orrian bertan edota Ondarroako Anaitasuna eta Kulixka tabernetan egin dezakete. Era berean, egunean bertan izena emateko aukera ere egon badago.
Aurreko urteetan egin legez, adin guztietako herritarrek parte hartzeko moduko ibilbideak prestatu dituzte. Hiru egongo dira aukeran; lehiakorrenek edo familia giroan eta lagun artean joan nahi dutenek, bata zein bestea aukeratu ahal izango dute. Denak ere, ikastola aurretik abiatuko dira.
Irtetzen lehenak, 54 kilometroko luzera eta 2.400 metroko desnibela dituen ibilbide luzean parte hartuko dutenak izango dira. Martxa Euskal Herriko iraupen ibilaldien zirkuiturako baliagarria izango da. 07:00ak aterako dira eta helmugara heldu bitartean, 12 bat ordu egin beharko dituzte inguruko mendietan zehar.
Ibilbiderik luzeena izateaz gain, zailena, gogorrena eta teknikoena berau dela nabarmendu dute antolatzaileek. “Hemen ez dugu oso mendi alturik, baina denak ere oso maldatsuak dira. Aldapa gora eta behera asko ditugu, eta 54 kilometro horrela egitea ez da bat ere erraza izango”.
Hala ere, ibilbidearen azken aldera nekatuta sentitzen direnek alternatiba motzago bat (47 kilometrokoa) egiteko aukera ere izango dute. Arnoaten, 35. kilometroan, aukera bat edo beste hartu ahal izango dute “norbere indarren arabera”.
Jende gehien batzen duen ibilbidea, ordea, 27 kilometroko motza izaten dela diote antolatzaileek. Herri giroa “apartekoa” izaten dela azpimarratu dute. “Izena ematen duten ia erdiak, hemen parte hartzen dute”.
08:30ean irtengo dute bertan parte hartuko dutenek, eta bost ordu eta erdi inguruan Ondarroako inguru guztietatik ibiliko dira. Denek ere, 800 metroko desnibela gainditu beharko dute.
Azkenik, familia giroan umeekin parte hartuko dutenek 10:30ean irtengo dute. Ibilbide txikian parte hartzen dutenentzat 11 kilometroko eta 400 metroko desnibela duen ibilbidea prestatu dute antolatzaileek.
Antolatzaileak domeka noiz helduko irrikitan daude, eta mendian egun pasa egin nahi duten guztiei Boga! mendi martxan parte hartzeko gonbitea zabaldu nahi die.
Iazko Boga! mendi martxako irudi bat. Argazkia: Aurrera Mendi Taldea
Ibilbide luzearen profila
Ibilbide motzaren profila
Ibilbide txikiaren profila
