Hontza kume bat agertu da Mutrikun
Mutrikuko udaltzaingoak jakitera eman duenez, gaur goizean hontza kume bat agertu da herrigunean. “Antza denez, galduta egon behar zuen. Egia esan, ez da ohikoena horrelako espezie bat herrigunean ikustea eta”, azaldu dute udaltzainek.
Udal langileek agertu dutenez, hegaztia txiki-txikia zen. “Oraindik ere lumatxaz betea zegoen, kumea zenaren seinale. Esku baten besteko tamaina izango zuen, gutxi gora behera”.
Hegaztia, hain zuzen ere, kantera atzeko aparkalekuetatik gertu agertu da. “Kantera atzeko aparkalekuko horman zegoen geldi-geldi”, agertu du herritar batek. Udaltzainek abisua jaso ondoren, Gipuzkoako Foru Aldundira deitu dute, eta hango arduradunek eraman dute. “Hontza eurek zainduko dute hemendik aurrera, eta behar dituen arreta eta zaintza guztia eskaini ahal izango diote”.
Hontza kume bat. Argazkia: pixabay.com
