32 bertsolarik parte hartuko dute Plazatik Gaztetxera txapelketan
Barikuan [maiatzak 8] hasi eta ekainaren 13ra bitartean jokatuko da XIV. Plazatik Gaztetxera Txapelketa. Urteekin ondo sustraituta dagoen txapelketa da Plazatik Gaztetxera, eta bere helburu nagusiak bi dira: «bertsolari gazteari kantatzeko aukera eman» eta «bertsoa gaztearengana gerturatzea».
Guztira, 32 bertsolari gaztek parte hartuko dute, bikoteka; horien artean izango dira Imanol Lekunberri Aretxabaleta mutrikuarra eta Eneko Arrate Sololuze markina-xemeindarra.
Hiru fasetan banatuta, guztira zazpi saio egingo dira. Lehenengo fasean, hamasei bikotek parte hartuko dute Soraluzen, Mutrikun, Eibarren eta Elgoibarren egingo diren lau kanporaketetan. Kanporaketa bakoitzeko bikote irabazlea zuzenean sailkatuko da, eta gainerako laurak puntuazioaren arabera sailkatuko dira.
Puntuazioari dagokionez, antolakuntza lanetan ari diren zazpi gazte asanbladetako kideek egindo dituzte epaile lanak. Era berean, eurek egingo dituzte gai jartze eta bestelako lanak ere.
Kanporaketei dagokionez, zapatuan[maiatzak 9] Mutrikun jokatuko da bigarren kanporaketa. Bertan, lau bikotetan banatuta, zortzi bertsolarik parte hartuko dute.
20:30ean hasita, bertso afaria egingo da gaztetxean bertan, eta ondoren hasiko da bertsolari gazteen arteko norgehiagoka.
KANPORAKETAK
Bertsolari gazteak Plazatik Gaztetxera txapelketan parte hartzen. Argazkia: Plazatik Gaztetxera
Finala, Markina-Xemeinen
Lehenengo kanporaketako zortzi bikote onenek, maiatzaren 22an Antzuolan eta maiatzaren 29an Deban jokatuko diren finalerdietan parte hartzeko txartela lortuko dute. Txapelketa borobiltzeko, Plazatik Gaztetxera Eguna egingo da Markina-Xemeinen, ekainaren 13an. Bertan bi kanporaketetan sailkatutako lau bikote onenak parte hartzeko aukera izango dute. Finala jokatzeaz gain, egun guztiko jaia ere egingo dela nabarmendu dute antolatzaileek. Saio guztiak 22:30ean hasiko dira, eta aurrez gaztetxeetan afaltzeko aukera ere egongo da.
Plazatik Gaztetxera txapelketa. Argazkia: Plazatik Gaztetxera
- Maiatzak 8, Soraluze
- Maddi Gallastegi eta Eneko Beretxinaga
- Aitor Salegi eta Aitor Irastorza
- Maialen Akizu eta Jon Gurrutxaga
- Asier Azpiroz eta Adur Gorostidi
- Maiatzak 9, Mutriku
- Imanol Lekunberri (Mutriku) eta Imanol Uria
- Malen Amenabar eta Eneko Arrate (Markina-Xemein)
- Aitor Servier eta Asier Galarza
- Aratz Igartzabal eta Gorka Maiz
- Maitzak 15, Eibar
- Eli Pagola eta Eñaut Martikorena
- Josune Arakistain eta Ander Zulaika
- Saioa Alkaiza eta Alazne Untxalo
- Maider Arregi eta Gemma Urteaga
- Maiatzak 16, Elgoibar
- Manex Astigarraga eta Maddi Sarasua
- Antton Aizpurua eta Ainhoa Sarasua
- Aitor Bizkarra eta Txabel Ormazabal
- Amaia Iturriotz eta Mikel Iturriotz
- Maiatzak 22, Antzuola
- Maiatzak 29, Deba
- Ekainak 13, Markina-Xemein
