Amilami ipuin musikatua ikusteko aukera egongo da Mutrikun
Mutrikuko udal kultura batzordeak antolatuta, haurrei zuzendutako ipuin kontakizun musikatua egongo da domekan [maiatzak 10]. 18:30etik aurrera, Pantzart antzerki taldekoek Amilami ikuskizuna eskainiko dute Zabiel kultur etxean.
Ikuskizuna adin guztietako umeei zuzendua baldin badago ere, 4 eta 11 urte bitartekoei egokitua dago. “Batez ere, familia giroan gozatzeko ikuskizuna izango da”. Sarrera doakoa izango da.
Amilami ikuskizunaren une bat. Ezkerrean, Ainhoa Pineda eta eskuman Elena Bezanilla. Argazkia: Pantzart Teatro
Ordubete inguru irauten dituen ipuin musikatua Juan Kruz Igerabideren Amilami eleberrian oinarritua dago. Istorioaren muina ongiaren eta gaizkiaren arteko borroka da.Tradiziozko kontakizunetatik abiatuta, Ainhoa Pineda eta Elena Bezanilla ipuin kontalariek lamien istorioak kontatuko dituzte, gertaera fantastikoak egungo jendartera ekarriz.
Lamien istorioez gain, kontaketaren baitan usain belarrak, sehaska kantak, aho korapiloak eta hainbat musika instrumentuekin egindako musikak txertatzen dira. Horretara honako instrumentuak erabiliko dituzte: ukelelea, eskusoinua, alboka, harmonika, txilibitua eta jostailuak.
