Egunak utzitako bestelako irudiak
Normaltasunez joan da eguna, aurkeztu diren talde eta hautagaitza guztiek nahi izaten duten eran, baina hamaika orduz bozkalekuak zabalik egonik, normala ere bai guztia hain normal ere ez joatea.
Herri batzuetan irisgarritasun arazoak konpontzen joan dira urteekin; eskailerak igota zeuden bozkalekuak kale mailan dauden aretoetan ipintzen. Hala eta ere, oraindik badaude arazoak. Aulestiko udaletxeko bozkalekuan arazo hori aspalditik konponduta daukate, igogailuari esker. Dena dela, guztia ezin daiteke aurreikusi, eta teknologiak ere huts egin dezake. Gaurkoan, modura. Han geratu da, minutu luze batzuetan igogailuan preso, fin-finean bozkatzera joan den aulestiarra.
Okerretako txartelagaz
NAN txartelaren ordez beste txartel batzuk erakutsi dituzte mahai batzuetan, Osakidetzako txartela edo errolda-agiria, adibidez, eta txartel egokiarekin eta botoa prest, EAJren hautestontzia zein zen galdetu duenik ere egon da. Seguru zekien hark zeini bozkatu behar zion. Beste batek ez horrenbeste, bozkatu eta berehala damutu baita egindako aukeraz. Mahaikoei esan die erratu egin dela, eta berriro bozkatu nahi zuela.
Ordu hilak telebista ikusten
Gehienek eguerdira arteko tartean jarraitzen dute bozkatzen. Goizean goiz ere ibiltzen dira batzuk. Ordu asko eta asko nobedade handirik barik joan ohi dira hautestontzien inguruan. Hori horrela izanik, Gizaburuagako mahaian telebista jartzen dute, ordu hilak pasatzen lagungarri izan dadin. Italiako Giroak eta pilota partidek emozio gehigarria ekarri zioten lau urtetik behingo hitzorduari.
Herritar bat, gurpildun aulkian bozkatzen
Gizaburuagako hauteslekua, telebista atzean dela.
