Ondarroa guztiak ospatu du Aurrera 3. mailara igo dela
Aurrerako jokalariek eta talde teknikoak goi-goitik ospatu zuten ondarrutarrekin batera taldea 3. mailakoa dela. Duela bi aste Gipuzkoako ohorezko mailako liga irabazi zuten Xepe Gallastegiren mutilek, baina atzo [maiatzak 23] egin zituzten ospakizunik handienak Ondarroan.
Eguna udalbatzako kideen ongietorriagaz hasi zuten, udaletxeko pleno aretoan. Hain zuzen ere, Ondarroako Udalak bere esker ona agertu nahi izan zion futbol taldeari egindako omenaldi xumean.
Udalbatzako kide bakoitzak pin bat ezarri zion jokalari eta talde teknikoko kide bakoitzari. Horrez gain, eskultura txiki bat ere jaso zuten. Bestalde, Eladino Gonzalez Aurreko presidenteak talde guztiaren izenean sinatutako elastiko bat eta bandera bat eman zion Argia Ituarte alkateari.
Arratsaldean jarraitu zuten ospakizunek. Aurrerak denboraldiko azken partida jokatu zuen Aretxabaletaren aurka. Beste behin ere, Zaldupe futbol zelaia jarraitzaileez bete-bete egin zen, eta sekulako giroa egon zen igoera ospatzeko.
Bina berdinduta amaitu zuten ohorezko mailako lehen eta bigarren sailkatuek. Partida amaitzean, ligako kopak banatu zizkieten talde bakoitzari. Aurrerako kapitainak jaso zuen ligako irabazleek kopa, eta ostean, jaiak eztanda egin zuen Zaldupen bertan.
Zaldupen egindako ospakizunek, aldiz, ez zuten etenik eduki. Taldeko kideek hurrengo sorpresa prest zuten Artibai ibaian. Orain 29 urte egin modura, igoera gabarran egin zuten ondarrutarrek.
Musika banda lagun, Artibai ibaian behera joan ziren Itxas Aurreko plazaraino. Handik, oinez, alde zaharrean egin zuten ospakizunen azken tartea.
[nggallery ID=242]
[nggallery ID=243]
[nggallery ID=244]
Argia Ituarte Ondarroako alkatea Eladino Gonzalez Aurrerako presidenteari oroigarria ematen
Ondarroako udalbatzak Aurrerari egindako harrera
