Kortazarrek eta Bernedok irabazi dute Arnoko XI. mendi lasterketa
Oihana Kortazar Aranzeta mutrikuarra eta Jose Mari Bernedo Isazelaia eibartarra nagusitu dira Arnoko XI. mendi lasterketan. Bernedok ordubete, 41 minutu eta 5 segundo behar izan zituen 22 kilometro pasatxoko ibilbidea egiteko eta Kortazarrek, aldiz, ordutebete, 50 minutu eta 8 segundo.
Korrikalari mutrikuarrak sasoiko dagoela erakutsi du, eta mendi lasterketako errekor berria ezarri du. 2011n ezarritako marka zortzi minutuan hobetzea lortu du. “Nire helburua, egia esan, ez zen errekorra egitea. Ibilbide horretan entrenatzen dut, eta entrenamendu on bat bezala hartu nuen. Beste urte batzuetako denborak erreferentzia modura hartuta, horiek hobetzen saiatu nintzen”.
Era berean, aspaldiko partez herrian korrika egitea polita izan dela nabarmendu du. “Azkenekoz 2011n egin nuen korrika, eta polita izan da berriro etxean lasterka egitea. Orduz geroztik, ezin etorrita ibili naiz. Aurten ez nuen inongo konpromisorik eta parte hartzea erabaki dut”.
Sailkapen orokorrari dagokionez, bertoko kirolariak ere aurrean ibili ziren. Hirugarren helmugaratu zen, esaterako, Joseba Plaza markina-xemeindarra. Lehen mutrikuarrak, ordea, Xabi Astigarraga eta Maite Aipurua izan izan ziren. Astigarragak ordubete, 50 minutu eta 32 segundo eta Aizpuruak bi ordu, 15 minutu eta 41 segundo behar izan zituen.
Oinezkoen mendi martxari dagokionez, oinezkorik parte hartzerik handiena egon dela jakinarazi du Burumendi Mendizale Elkarteak. 250 pertsona inguru espero zituzten, baina aurreikuspenak apurtu, eta 277 pertsonak parte hartu dute aurten. Korrikan egin dutenen datuari dagokionez, aurten zer edo zer gutxiago izan dira:75.
Burumendiko kideak, oro har, pozik geratu dira. “Giroa primerakoa izan zen, eta ez zen inongo eragozpenik egon. Horrez gain, eguraldi ona egin zuen, mendian ibiltzeko egokia”.
Lasterketa amaitu eta sari banaketan ere giro ona nagusi izan zen Mutrikuko Goiko Plazan. Eguerdira arte plaza eta inguruak jendez bete zirela nabarmendu dute antolatzaileek.
SAILKAPENAK
Oihana Kortazar helmugan sartzen. Argazkia: Burumendi
Xabi Astigarraga eta Maite Aizpurua, lehenengo mutrikuarrak. Argazkia: Burumendi
Parte hartzaileak helmugara ailegatzen. Argazkia: Burumendi
- Senior emakumeak
- Oihana Kortazar 1:50:08 (Mutriku)
- Uxune Tena 2:07:04 (Andoain)
- Maider Fraile 2:12:54 (Uharte)
- Senior gizonezkoak
- Jose Mari Bernedo 1:41:05 (Eibar)
- Jon Ugalde 1:45:08 (Andoain)
- Joseba Plaza 1:48:09 (Markina-Xemein)
- Beteranoak emakumeak
- Sonia Albarez 2:20:38 (Zumaia)
- Ana Reina 2:23:44 (Lesaka)
- Pilar Arriola 2:29:07 (Elgoibar)
- Beteranoak gizonezkoak
- Jon Urdangarin 1:55:33 (Urnieta)
- Mikel Alkorta 1:56:56 (Zestoa)
- Ladis Velasco 1:57:23 (Mutriku)
