Jon Ansotegi Realeko jokalaria izango da beste urtebetez
Realak jakitera eman duenez, akordioa lortu du Jon Ansotegi jokalari berriatuarraz. Atzelari txuri urdinari ekainaren 30ean amaitzen zitzaion Donostiako taldeagaz zuen kontratua, eta orain, urtebete gehiagoz luzatu du bere kontratua, 2016ra arte.
Jon Ansotegik atzo [ekainak 1] sinatu zuen bere kontratu berria Anoetako bulegoetan, Jokin Aperribai presidentearekin batera.
Berriatuarra “oso pozik” agertu da kontratua luzatu ostean. “Klubaren aldetik eta bai nire aldetik, oso pozik gaude elkarrekin gauza zelan joan den. Eurek beste urtebete gehiago hemen gelditzeko eskaini didate, eta nire partetik oso pozik onartu dut. Hogei urterekin etorri nintzen etxe honetara, beti bikain tratatu naute, dena ematen saiatu naiz. Aurrerantzean ere, horrela jarraituko dut”.
Kontratua sinatu ostean, berrituko zuen edo ez dudak izan zituela ere aitortu du atzelari berriatuarrak. “Hainbeste urte eta gero taldean berdinean zaudenean, beti egoten da duda hori. Ez dakigu noiz, baina denok dakigu honek azkenean amaiera bat izango duela. Klubaren aldetik konfidantza hori erakutsi didate, eta urtebetez hemen jarraitzeko eskatu. Azken batean, hau nire etxea da, eta hemen baino hobeto ez naiz inon egongo”.
David Moyes entrenatzailearen aldetik izan duen konfiantza ere eskertzekoa dela nabarmendu du. “Entrenatzaileak esan zidan maiatzean bere ideia zela nik hemen beste urtebete jarraitzea. Hori entrenatzaile baten ahotik entzutea oso pozgarria da”.
Jokin Aperribai eta Jon Ansotegi kontratua sinatzen. Argazkia: realsociedad.com
