Uxue Alberdi idazleagaz solasaldia, Etxebarrian
Uxue Alberdi idazleak Aulki-Jokoa, bere lehen eleberriari buruz berba egingo du bihar, ekainak 3, 19:00etan Etxebarriko ekitaldi aretoan izango den solasaldian. Etxebarriko Udalak eta Udal liburutegiak irakurketa tailerra antolatu dute aurten ere, eta martxoaren 30etik ekainera Uxue Alberdiren liburua eskuratu eta irakurtzeko aukera izan dute etxebarritarrek. Irakurritakoaz galdetu eta eztabaidatzeko aukera izango dute orain, idazleagaz.
Biharko solasaldia, heldu zein gazteei zuzenduta dagoela jakitera eman dute antolatzaileek. Literatur estiloaz, tramaz, pertsonaiez eta hiztegiaz jardungo dute.
Idazlea
Uxue Alberdi Estibaritz (Elgoibar, 1984). Kazetaritzan lizentziatua da, eta hainbat lanetan aritzen dena: kazetari, itzultzaile, bertsolari eta idazle. Literaturan, Aulki bat elurretan ipuin-bilduma kaleratu zuen 2007an eta Aulki jokoa 2009an; haur literaturan, aldiz, Eta zer? bildumako Ezin dut, eta zer?, Marizikina naiz, eta zer?, Zure denboraren truke eta Pirritx eta Porrotxen abenturak idatzi ditu.
Umeen jolasa ez ezik, aulki-jokoa bizitzaren metafora dela dio: “aldiro gutako bat geldituko da lekurik gabe, eta utzi egin beharko du joko-zelaia”.
Uxue Alberdiren Aulki-jokoa liburuaren azala. Argazkia: Elkar
