Danok Batek irabazi du Gipuzkoako Herriarteko Txapelketa

2015/06/30

Zumaiako zesta-punta taldeko bikoteen aurka kadete, gazte eta nagusi mailetan irabazi eta gero, aurten ere, Mutrikuko Danok Bat Pelotazale Elkarteko kideek jantzi dute Gipuzkoako Herriarteko txapela. Elkarteko kideak pozez gainezka daude txapelketa irabazi eta gero. “Txapelketa berriro irabaztea gauza handia eta pozgarria da guretzako. Azkenaldian, zorteko gabiltza: hirugarren urtez jarraian irabazi dugu Gipuzkoako txapela. Horrelako boladak aprobetxatu egin behar izan dira, beti ere, ez da horrelako aukerarik egoten eta”, nabarmendu dute Danok Bateko arduradunek.

Danok Bat herriarteko txapeldun. Argazkia: Danok Bat

Txapelketako lehenengo partida nahikoa erraz irabazi zuten Ekaitz Mendizabalek eta Mikel Manzisidorrek. 30-8 nagusitu zitzaien Joseba Agirre eta Cristian Saez zumaiarrei. Gazteek, ordea, zailtasun gehiago izan zituzten. Jon Goenagak eta Aitor Andonegik partidaren lehenengo zatian ez zuten gehiegirik asmatu, eta tanto asko galdu zituzten. Hala ere, azken tantoetan partidari buelta ematea lortu zuten mutrikuarrek, eta tantoak bata bestearen atzetik lortu zituzten, partida 35-22 irabaziz Eduardo Agirre eta Iñaki Lopetegi Zumaiako bikoteari.

Danok Bat, Gipuzkoako txapeldun. Argazkia: Danok Bat

Lehen bi partidak irabazita txapelketa erabakita bazegoen ere, Jon Mendizabal Goixerri eta Iker Barrenetxea etxeko bikotea dena ematera atera zen Miruaitzeko kantxara. Mutrikuarrak ondo baino hobeto moldatu ziren Mikel Alonso eta Ekaitz Osa zumaiarren aurka, 35-22 irabaziz. Euskal Herriko Herriarteko Txapelketa Gipuzkoako Herriartekoa irabazita, Euskal Herriko txapelketa jokatzeko sailkatu dira mutrikuarrak. Atzo [ekainak 29] egin zen zozketa, eta Danok Bateko kideek, iaz gertatu modura, Markina-Xemeingo taldearen aurka jokatu beharko dituzte finalaurrekoak. Joaneko finalaurrekoa Mutrikun jokatuko da domekan [uztailak 5], 11:00etan. Itzulerakoa, ordea, Markina-Xemeinen jokatuko da. Bi partidetan emaitza onenak lortzen dituztenek uztailaren 19ko finalerako txartela lortuko dute zuzenean. Galtzen duenak, aldiz, hirugarren postua lortzeko aukera izango du egun berean. Finalari dagokionez, Cabanillas (Nafarroako txapeldunak) edota Gasteiz (Arabako txapeldunak) izango dituzte aurkari mutrikuarrek edo markina-xemeindarrek.