Lekitto Bedarrak loren inguruko ikastaroa eskainiko du
Orain arte egin modura, beste behin ere Lekitto Bedarrak ikastaro “berezi” bat eskainiko du. Oraingoan loreen ingurukoa izango da eta zapatuan egingo da, 11:00etatik 13:00etara, Usotegi parkean. Ikastaroan parte hartzeko baina, aurretiaz izena eman behar da. Horretarako, herritarrek kultur etxera gerturatu edo deitu beharko dute (94-624 34 82); kultur etxea arratsaldez dago zabalik. Halaber, ikastaroan, gehienez ere 25 pertsonek parte hartu ahalko dutela iragarri dute taldeko kideek. Izena emateko azken eguna eguena da.
“Azkenengo ekitaldietan parte hartu dutenen artean egindako inkestetan gai hau lantzeko eskatu zuten”, gaineratu dute. Horrela ba, loreen ezaugarri nagusienak ezagutzeko aukera edukitzeaz gain, ikastaroan erreprodukzioa, zainketa, ongarriak, ureztatzea… ere landuko dituzte.
Ikastaroa Olatz Eiguren Kostalan Lorezaintza enpresako lekeitiarrak eskainiko du. “Lorategi zainketan eta diseinuan esperientzia dauka”. Ikastaroa euskaraz izango da eta bi orduko iraupena edukiko du. “Amaieran, eta praktika modura, Usotegi aurrean dauden hiru lorontzi lorez beteko ditugu”.
Ikastaroagaz, Lekitto Bedarrak Usotegin dauden hazi haztegietan loreak ekoizteko aukera eman nahi die herritarrei. “Bai eta herrian dauden udaleko lorontzietan auzo zainketa bultzatzea eta herriko balkoi eta leihoetan loreak jartzeko ohitura berreskuratu”.
Beste alde batetik, joan den asteko zapatuan, Lekeitioko Gazte Asanbladako kideak gerturatu ziren Usotegira. “Lekitto Bedarreko kideok ezagutza partekatzeko programa berezia prestatu genuen”.
Lehenik eta behin gazte asanbladako kideei ongietorria egin zieten, eta jarraian, Usotegiren funtzioa eta Lekitto Bedarra taldearen inguruko azalpenak eman zizkieten. “Konpost gunea ere erakutsi genien eta daukan garrantzia azpimarratu genien”. Landaketa eta ureztatzea ere hizpide izan zuten. Gazte asanbladakoek “esperientzia erakargarria” izan zelan esan zieten. “Egun berean, baita ere, Ameriketako Estatu Batuetatik etorritako familia bati ere Usotegiren inguruko azalpenak eman genizkion”.
Gazte asanbladako kideak, Usotegin. Argazkia: Lekitto Bedarra
Gazte asanbladakoak, Usotegin. Argazkia: Lekitto Bedarra
