Euskal Herriko Herriarteko finala jokatuko du Danok Batek
Markina-Xemeingo Zesta-Punta Eskolaren aurka finalerdi estua eta lehiatua jokatu ondoren, Mutrikuko Danok Bat Pelotazale Elkarteko kideek jokatuko dute Euskal Herriko Herriarteko Txapelketaren finala.
Espero modura, kadete eta gazte mailan lortutako garaipenei esker lortu dute mutrikuarrek finalerako txartela. “Oso pozik gaude, aurten ere finalean parte hartzeko aukera dugulako. Markina-Xemeingo bikoteak oso aurkari gogorrak izan dira. Euren aurka jokatu ditugun partidak oso lehiatuak izan dira, eta hurrengo fasera pasatzea ez da batere erraza izan”, nabarmendu dute mutrikuarrek.
Kadete mailan, esate baterako, Danok Batekoek erraz menderatu zituzten markina-xemeindarrak. Mendizabalek eta Manzisidorrek 30-9 irabazi zien Mandiolari eta Arrietari.
Gazte mailan, ordea, azken tantoetaraino lehia oso estua egon zen. Mutrikuko Goenagak eta Andonegik 35-32 irabazi zioten Markina-Xemeingo Mandiolari eta Egiari. “Gazte mailan, partida okertu egin zen, eta irabaztea oso zaila izan zen. Gure bikotea ez zen fin aritu, eta partida osoa aurretik joan baginen ere, aurkariak atzetik oso hurbil izan genituen. Egia esan, Mandiolak eta Egiak oso partida ona jokatu zuten”, azaldu dute Danok Bateko arduradunek.
Nagusietan, azkenik, Markina-Xemeingo bikoteak lortu zuen tantoa. Arbe eta Zabalak partida bikaina jokatu zuten, eta 35-24 irabazi zien Mendizabali eta Elezgarairi. “Goixerrik min hartu zuen, eta gauzak nahikoa korapilatu zitzaizkigun. Zaintiratu txiki bat izan zuen izterrean Mendizabalek, eta ondo jokatu bazuten ere Arbe eta Zabala menperatzea ez zen posible izan. Aurkariak oso onak direla kontutan hartuta, emaitza ona dela deritzogu”.
Markina-Xemeinen aurka lortutako garaipenaren ondoren, iazko irabazleak barikuan [uztailak 17] Mutrikun jokatuko den finalean titulua berresten saiatuko dira. Aurkari ezaguna izango dute mutrikuarrek. Nafarroako Cabanillas taldeari irabari ondoren, Gasteizko zesta-punta eskolako kideen aurka jokatuko dute finala. “Iaz ere euren aurka jokatu genuen Euskal Herriko Herriarteko Txapelketako finala, eta aurten ere horrela izan da”, azaldu dute Danok Bateko ordezkariek.
Barikuan Miruaitz frontoira hurbiltzen diren zaleetuek ikuskizuna ziurtatuta izango dute, 19:30etik aurrera. Etxeko taldeak adierazi duenez, gainera, aurten ere titulua lortzen gogor saiatuko dira. “Gure burua nahikoa aukerekin ikusten dugu, eta gainera etxean jokatzea tokatu zaigu. Kadeteetan eta gazteetan gure esperantza guztiak ipinita ditugu, eta bi puntu horiek lortuz gero, txapelketa bigarrenez jarraian lortzea lortuko dugu. Kantxan behintzat, dena ematen saiatuko dira gure bikoteak”.
Finalari dagokionez, datozen egunotan Goixerri zelan dagoen ikusi beharko da. Haren arabera, bikoteak aldatu edo ez erabaki beharko dute. “Goixerri jokatzeko moduan ez baldin badago, gazteetako bat nagusiekin jokatzen ipiniko dugu. Hori guztia aztertzen ari gara. Egun gutxi falta dira, eta Goixerrik zail du jokatzeko, baina azken momentura arte ezingo dugu ezer argirik erabaki”.
Aurreko astean Markina-Xemeinen aurka jokatutako partidetako bat. Argazkia: Danok Bat
Markina-Xemeinen aurka jokatutako joaneko finalerdia. Argazkia: Danok Bat
