Euskal Herriko Herriarteko finalean sartzeko aukera gutxi ditu Markina-Xemeinek

2015/07/14

Azpeitiaren aurka joaneko finalerdia galdu ostean, Euskal Herriko Herriarteko Esku Pilota Txapelketaren finalean sartzeko aukera gutxi ditu Markina-Xemeinek. Markina-Xemeingo Esku Pilota Taldeko kideek ez zuten egunik onena eduki, eta Azpeitiko Izarraitz frontoitik 2-1 galduta bueltatu ziren. Kadeteei dagokionez, Unanue eta Alberdi azpeitiarrek erraz menderatu zituzten Agirreamalloa eta Ibarloza. 22-5 irabazi zuten gipuzkoarrek. Gazteak, ordea, oso indartsu hasi ziren hasieratik. Markina-Xemeingo Arrizabalagak eta Urizarrek ondo erantzun zuten kantxan eta 22-4 irabazi zien Iriarte eta Egigureni.

Izarraitzen jokatutako partidetako bat. Argazkia: Eneritz Albizu /Urola Kostako Hitza

Nagusietan, aldiz, tantoa etxekoentzat izan zen. Larrañagak eta Murgiondok aurkariei aukera gutxi eman zien eta 22-3 irabazi zien Markina-Xemeingo Albizu eta Pujanari. Joaneko partida Markina-Xemeinen jokatuko da barikuan [uztailak 17], 19:00etatik aurrera. Azpeitian lortutako emaitzak oso onak ez baziren izan ere, etxean jokatuko duten norgehiagokan esperantza guztiak jarrita dituzte. “Gauzek ez ziguten batere ondo irten. Joanekoan ez dugu ilusio hori galduko eta kantxan behintzat itxura ona ematen saiatuko gara”.

Azpeitiak eta Markina-Xemeinek jokatutako partidetako bat. Argazkia: Eneritz Albizu /Urola Kostako Hitza

Hain zuzen ere, partida gehien irabaztea lortzen duenak uztailaren 25ean Labriten jokatuko den finalerako txartela lortuko du. “Finalerako sailkatzea gaitz ikusten badugu ere, gogor saiatuko gara. Lortutako emaitzekin, partida guztiak irabazi beharko genituzte, edo gutxienez, bitik bat irabazi. Hala ere, tanteoa kontra dugu, beraz aukerak asko murrizten dira”.