Danok Batek jantzi du Euskal Herriko herriarteko txapela

2015/07/20

Mutrikuko Danok Bat Pelotazale Elkarteko kideek irabazi dute Euskal Herriko herriarteko zesta-punta txapelketa, bigarren urtez jarraian. Elkartek arduradunek Gasteizen aurka garaipena lortzea oso pozgarria dela nabarmendu dute. “Oso pozik gaude; elkartearentzat berarentzat berri oso pozgarria da. Bi urte jarraian txapelketa irabaztea lortu dugu, eta hau guztia urte askoko lanaren emaitza da. Etorkizunean ere aurrera jarraitzeko kemena ematen digu”.

Danok Bateko eta Gasteizko kideak. Argazkia: Danok Bat

Aurreikusita modura, 2-1 irabazi zioten Gasteizko taldeari. Hain zuzen ere, kadete eta gazte mailan lortutako garaipenei esker, jantzi dute berriro txapela. Final handia ikusteko, gainera, Miruaitz frontoia jendez bete zen. Beheko alde guztia jendez beteta egon zen eta goiko harmailetan ere nahikoa jende batu zen. Guztira, 300 bat pertsona batu ziren frontoian. “Poza ematen du horrenbeste zaleturen aurrean horrelako mailako partida bat jokatzea. Giro ederra egon zen, eta jokalarientzat ere motibagarria izan zen”, gaineratu dute Danok Bateko arduradunek. Hainbat aldaketa Aurreko astean Jon Mendizabal Goixarrik min hartu zuen, eta hori dela eta, bikoteen osaketan aldaketa batzuk egin behar izan zituzten Danok Bateko arduradunek. Zehatz esanda, Mendizabal kadeteak gazte mailan jokatu zuen eta Goenagak nagusi mailan parte hartu zuen. Kadete mailan Manzisidor anaiek Gasteizko Perez eta Uribe izan zituzten aurkari. Ondo baino hobeto moldatu ziren kantxan eta 30-10 irabazi zuten. Gazte mailan ere, erraz irabazi zuten Mendizabalek eta Andonegik. Gasteizko Gonzalezi eta Larrazabali 35-15 irabazi zieten.

Herriarteko txapelketako finalistak. Argazkia: Euskadiko Euskal Pilota Federakuntza

Nagusietan, ordea, gauzak parekatuago ibili ziren eta bikote osatu berria nahikoa ondo konpondu bazen ere, azken tantoetan ihes egin zien partidak mutrikuarrei. Goenagak eta Elezgaraik irabazteko ahalegin handiak egin bazituzten ere, ezin izan zituzten Del Rio eta Suso harrapatu. Gasteiztarrek bikote indartsua dutela argi utzi zuten eta 29-35 irabazi zuten.