Dispertsioagaz amaitzeko pausoak eman dituzte Lekeition
Dispertsioaren mapa irudikatu eta sakabanaketak sortzen dituen ondorioak erakutsi zituzten Lekeition, zapatuan. Dispertsioagaz amaitzera goaz izenpean, egun osoko egitaraua antolatu zuen Lekittoko Sarek, euskal preso politikoek, haien familiek eta lagunek pairatzen duten egoera kaleratu eta horregaz amaitu beharra dagoela nabarmentzeko.
Eskolapean batuta, dispertsioaren mapa eta sakabanaketak sortzen dituen ondorioen inguruko erakusketa bat prestatu zuten. Bai eta argazki erakusketa bat eta bideo emanaldi bat ere. Horretaz gainera, mural bat margotu zuten herritarrek, eta Sarek argitaratutako Dispertsioaren Liburuxka irakurri zuten. Herriko zenbait eragilek hartu zuten parte irakurketan, Miren Agur Meabe idazleak, On Kepa abadeak, Bitxor Txakartegi ilustratzaileak, Xabier Iturbe Lekeitioko Eskolako zuzendariak, Alejandro Goikoetxea medikuak, Maitane Larrauri alkate ohiak, Koldo Leniz errealizadoreak, Peru Aranburu preso ohiak, Iratxe Goitia Ernaiko kideak, eta Haritz Garate kirolariak besteak beste.
Goizeko ekitaldiak amaituta, 240 pertsona batu ziren plazan, bazkaltzeko, eta kantaldia izan zuten ondoren. Amaitzeko, argazki erraldoia atera zuten guztiek batera.
Dispertsioagaz amaitzeko egunean ataratako argazki erraldoia. Argazkilaria: Lekittoko Sare
Mural bat margotu zuten herritarren artean, Eskolapean. Argazkia: Lekittoko Sare
