Esku pilotako herriarteko finalaren atarian geratu da Markina-Xemein
Barikuan [uztailak 17] Markina-Xemeingo Uni frontoian jokatu zen bueltako finalerdian fin aritu baziren ere, Markina-Xemeingo Eskupilota Taldeak ezin izan du Euskal Herriko herriarteko finalerako txartela lortu. “Maila ona eman genuen, baina ezin izan dugu finalera pasa. Finaleko atarian geratu gara eta horrek zer edo zer penatzen bagaitu ere, pozik gaude lortutako emaitzagaz. Bizkaiko herriartekoa irabaztea oso zaila izan zen, eta Berria txapelketan finalera ailegatzea ere oso pozgarria izan zen”.
Aurreko astean Azpeitian jokatutako emaitza txarrei ezin izan zien bueltarik eman, eta kantxan itxura ona eman bazuten ere, Azpeitiaren aurka 1-2 galdu zuten, bigarrenez. Markina-Xemeingo Eskupilota Taldeko kideen iritziz, aurkariek oso ondo jokatu zuten eta “argi utzi zuten euren nagusitasuna”.
Azpeitian gertatu modura, kadete eta nagusi mailan ez zuten asmatu etxekoek. Kontran, ostera, gazte mailan bikote bikaina dutela agertu zuten markina-xemeindarrek eta erraz gainditu zituzten aurkariak.
Gaueko lehen partida kadeteek jokatu zuten. Agirreamalloak eta Ibarlozak partida oso gogorra eta lehiatua jokatu zuten Azpeitiako Unanueren eta Alberdiren aurka. Partida osoan nahikoa berdinduta joan baziren ere, azken tantoetan aurrea hartu zuten azpeitiarrek 14-22 irabaziz.
Gazteetan, ostera, Arrizabalagak eta Urizarrek aukera gutxi utzi zien Azpeitiako Iriarte eta Egigureni. 22-7 irabazi zuten etxekoek. Azkenik, nagusietan, hasieratik partida oso berdindua eta borrokatua izan zen. Albizu eta Pujanak maila ona erakutsi zuten eta partida erdira arte, Larrañaga eta Murgiondoren pareko ibili ziren. Azken tantoetan, ordea, azpeitiarrek tantoak errenkadan lortu eta 19-22 irabazi zuten.
Hilaren 25ean Azpeitiak eta Huartek jokatu dute finala.
Markina-Xemeinek eta Azpeitiak jokatutako partidetako bat. Argazkia: Urola Kostako Hitza
Sake bat ateratzen. Argazkia: Urola Kostako Hitza
Markina-Xemeinek eta Azpeitiak jokatutako partida bat. Argazkia: Urola Kostako Hitza
