Usadio zaharrei eutsita ospatu dute Piñastei Eguna Mutrikun

2015/09/16

Gaurkoan [irailak 16], Piñastei egunak moilara eraman ditu Mutrikuko Galbaixoak. Ohitura zaharrei hutsik egin gabe, mahonezko arropa eta arrantzale zapia lepoan lotuta hasi dute eguna mutrikuarrek. Piñasteiko txerria eta bi txerritxoak aurretik zituztela, herritarrak kalejiran joan dira portura. Betiko modura, Goiko Plazatik irten du kalejirak bandako doinuek alaituta, buruhandi eta erraldoi konpartsarekin batera. Kalejira moilara helduta, jaiak eztanda egin du portu eta inguruetan guztia urdinez tindatuz.

Sardina erreak prestatzen

Ordurako, herritarrak sardina erreak prestatzen hasita zeuden kofradia azpiko arkupean. 11:00ak inguruan biztu dituzte parrillak, eta arrain usaina moila guztian zabaldu da.

Itsulapiko apurtzen

Bien bitartean, gainera, Aizabia elkarteko kideen eskutik beti-betiko jolasak egin dituzte moilako sarreran. Besteak beste, bizikleta edota patinete gainean jarrita, sokatik zintzilik zeuden uztai txikiak harrapatu dituzte, eta horrez gain, lurrezko itsulapikoak apurtzen ibili dira, itsu-itsuka. Hainbesteko lanak hartuta gero, gainera, euren saria izan dute eltze apurtzen eta uztaiak harrapatzen ibili direnek.

Zinga txapelketako irabazlea eta bigarren sailkatua

Horrez guztiaz gain, Mutrikuko zinga txapelketa ere egin dute portuko uretan. Arraun elkartekoen eskutik, garai bateko kirola ezagutzeko aukera izan dute askok. Parte hartu duten guztien artean markarik onena egin duten herritarrak Jon Koldo Romero eta Joxemi Bedialauneta Papardo izan dira. Bien arteko azken buruz burukoa oso lehiatua izan bada ere, hiru segunduko abantailarekin Bedialaunetak jantzi du txapel preziatua.

Eguerdiko sokamuturra

Jarraian, eguerdiko sokamuturra hasi da. Zezenen aurrean ipini eta saltaka egitera ausartu direnek animaliarengandik hurbil ibili dira, adarrei eta helduta. Hainbeste korrikaldi egin eta gero, 14:30ak inguruan amaitu da eguneko lehen sokamuturra. Arratsaldean ere zer ospatua eduki dute mutrikuarrek. Besteak beste, ahateen harrapaketa eta kukaña egin dituzte. Gomazko ahateen atzetik igeri dozenaka haur ibili dira. Kukañan, ordea, bederatzi izan dira ikurrina hartzera ausartu direnak. Ahalegin ugari egin eta gero, Babacar Senek eskuratu du ikurrina eta 50 euroko saria. Arratsaldeko sokamutur jendetsuak agurtu du gaurko eguna. Galbaixoek, ordea, ez dute etenik. Izan ere, domekan ere zer ospatua egongo da Galbaixoko ermitaren inguruetan egingo den Galbaixotarren egunean. EGITARAUA. Irailak 20, domeka

12:00. Meza hiru auzoetako hildakoen alde.
13:00. Omenaldia Jose Manuel Ibiriri.
Jarraian. Auzokoen arteko herri kirolak eta neska proba.
Egun osoan. Izer eta Lutxurdixoren erromeria.
18:00. Gizon proba: Itziarren eta Mendaroren arteko lehia.