Jose Manuel Ansorregi omendu dute Galbaixotarren Egunean
Aurreko asteko jai egunen ondoren, Galbaixoetako azken eguna ospatu zuten atzo [irailak 20] mutrikuarrek. Eguraldi eguzkitsua lagun, hainbat herritar eta auzotar batu ziren Galbaixotarren Eguneko ospakizunetan.
Hiru auzoetako hildakoen aldeko meza elizkizunak amaitu eta gero, herri kirolen txanda izan zen. Hain zuzen ere, herri kirolen tartea Jose Manuel Ansorregi Egaña Ibiriri eskainia egon zen. Herri kiroletan egin zen ezaguna Ibiri, eta auzotarrek hari aitortza egin nahi izan zioten. Besteak beste, trontzan, lokotx biltzen eta txinga eramaten aritu ziren bateko zein besteko auzotarrak.
Ondoren, eguerdiko momenturik hunkigarriena etorri zen. Jose Manuel Ibiri zenaren bi alabek (Uxue eta Ainitze Ansorregi) eta bi ilobek (Kepa eta Unai Zubiaurre), bikoteka, trontzan erakusketa ederra egin zuten eta Mendaroko neskek egindako neska proba ere Ibiriri eskaini zioten. Azkenik, senideei omenaldi xumea egin zieten Galbaixoko auzotarrek eta probetan aritu ziren neskek. Jai batzordeko kideek, esaterako, bertso bat daraman plaka eman zioten Ibiriren alargunari eta haren seme-alabei.
Eguerdian, 20 bat auzotar bazkaritan batu ziren, Izer eta Lutxurdixok girotutako erromerian. Arratsaldean, aldiz, Mendaroko eta Itziarko taldeak gizon proban lehiatu ziren. Bi taldeen arteko lehia ederraren ondoren, Mendarokoek irabazi zuten atzoko norgehiagoka. 20 minutuan 51 plaza egin zituzten irabazleek, bigarren sailkatuek baino hiru plaza gehiago.
Azkenik, egunarekin bukatzeko, jaietako zozketa egin zuten. Honakoak dira zenbaki sarituak: lehen saria (600 euro) 3.377 eta bigarren saria (200 euro) 3.114.
Ibiriren alabak eta ilobak trontzan. Argazkia: Nerea Arrizabalaga
Itziarko taldea gizon proban. Argazkia: Nerea Arrizabalaga
