Kalejiran zabaldu dute txokoa libre uzteko aldarria Markina-Xemeinen

2015/09/21

Txoku Libre Eguna izandatu zuten zapatua, irailak 19, Markina-Xemeinen. Herriko txokoa, dagoen Urbitarte kalea laranjaz apaindu eta bere aurrean elkartu ziren herritarrak bazkaltzeko. Bazkalostean bertso saioa izan zuten Eneko Arrate eta Iratxe Ibarra bertsolariekin. Joseba Sololuzek jarri zituen gaiak eta umorea, kritika eta salaketa tarteko, mahai luzeetan jarrita zeudenen entzuleen barre eta txaloak eragin zituzten bertsolariek.

Bazlalostean txokoaren aurrean egindako bertso saioa.

Mahaiak jaso eta joaldunak prestatutakoan, txoko aurretik herri osora zabaldu zuten “Txoku libre eta zabalik” aldarria. Joaldunen doinu indartsua aurretik, kartel eta pankartak ipiniaz egin zuten kalejira laranja markina-xemeindarrek. Aldaola kaletik Iturritxu kalerantz jo zuten eta Kai aurretik Frai Bartolomen zehar alde zaharrerako bidea hartu zuen taldeak. Alde zaharrean zehar kartelak ipini eta aldarria zabaldu ostean, Zelaira joan ziren kalejiragaz amaitu eta trikipoteoari hasiera emateko. Herriko tabernak defendatzeko prest Espainiako Auzitegi Gorenak ekainaren 18an Auzitegi Nazionalaren epaia berretsi zuenetik ixteko arriskuan daude 107 herriko taberna. Lea-Artibai eta Mutrikuri dagokionez, Markina-Xemeingo Amaiur, Lekeitioko Galarrena, Ondarroako Uxola eta Mutrikuko Zubixa daude tartean. Bertakoak zein beste guztiak izan zituzten gogoan zapatuko Txoku Libre Egunean. Txokoaren aurrea jarri zituzten banderatxoetan guztien izenak ipini zituzten, eta herriko tabernak defendatuko dituztela argi utzi zuten zapatuan Markina-Xemeinen.