Hauteskundeen behin betiko balorazioa egingo du Lekeitioko EH Bilduk batzar zabalean
Lekeitioko EH Bilduk batzar zabala deitu du biharko (urriak 1). Uda aurretik egindako batzar zabalean, militanteek inkesta bidez egindako balorazioen berri emango dute bertan, hau da, udal hauteskundeen behin betiko balorazioa egingo dutela jakitera eman dute. Batzarra kultur etxeko Azkue aretoan izango da 19:00etan.
EAJk udal gobernuan sartzeko egindako eskaintza ere azalduko dute batzarrean. Izan ere, Lekeitioko EAJk udal gobernuan sartzeko gonbitea egin zion EH Bilduri udalaren buru jarri zirenean, eta batzordeburutza bi eskaini zieten: kultura eta gazteria. “Batzarrean udal gobernuan sartu edo ez sartu baloratzen hasiko gara, eta azkenean, beste batzar zabal batean, militanteek erabakiko dute sartzea komeni den edo ez den”, azaldu dute.
Beste alde batetik, zapatuan (urriak 3), Bakea, erabakia lelopean EH Bilduk deitu duen Donostiako manifestaziora joateko autobusa antolatu dute. Autobusa Mandaskatik irtengo da 15:30ean. Autobusean joateko izena Galarrenan edo Guzurmendi tabernan eman daiteke. Izena emateko azken eguna barikua izango da.
EH Bilduko zinegotziak gobernu osaketa egunean.
