Zesta-punta jaialdia Markina-Xemeinen, Izarbidean eta zesta-punta eskolaren alde

2015/10/08

Zesta-Punta jaialdi handia antolatu dute Izarbidean elkarteak eta Zesta-Punta Eskolak urriko azoka egunerako. Talde biek indarrak batu dituzte herritarrei maila handiko zesta-punta ikuskizun bat eskaintzeko asmoz, eta bide batez, lortzen dena, elkarteari eta eskolari laguntzera bideratuko da. Zapatuan, urriak 10, izango da jaialdia, 18:00etan, Uni frontoian.

Josu Mugartegi Zesta-Punta Eskolako lehendakaria eta Izarbidean elkarteko Mari Eli Ituarte eta Luis Egurrola.

Zesta-punta jaialdi handiak egon dira urtero Karmen Egunean, Markina-Xemeinen. Aurten, baina, ez da pilotari profesionalekin jaialdi berezirik egitea posible izan, eta beraz hutsune hori bete nahi dute herriko elkarte biek jaialdi on bat eskainita. «Horrelako ekintza bat antolatzeak aurrekontu handia eskatzen du, eta beraz, bi taldeok bat egin dugu jaialdia posible egiteko», azaldu du Josu Mugartegi Atain Markina-Xemeingo Zesta-Punta Eskolako lehendakariak. Jaialdi on batek maila goreneko pilotariak behar zituela eta, «Euskal Herrian geratzen diren onenak» gonbidatu dituztela azaldu du zesta-punta eskolako lehendakariak. Lehenengo partidan eskolako pilotariek jokatuko dute. Jokin Arbe eta Eñaut Salegi markina-xemeindarrak egongo dira alde batetik, eta Antxon Alberdi Etxebarriako aurrelaria eta Jonathan Etxebarrieta Etxeba markina-xemeindarra bestetik. «Afizionatu mailan jokatzen duten pilotari onenen artekoak dira», nabarmendu du Mugartegik.

Jaialdiko kartela

Profesional mailan, bestalde, Goikoetxeak eta Inzak, Egiguren II eta Alliez I izango dituzte aurkari. «Enbil eta Irastorzagaz jarri ginen kontaktuan hasiera batean, baina, Enbil mina hartuta dago eta Irastorzak bere negozioaz arduratzera joan behar izan du. Beraz, hemen geratzen diren profesional hoberenak aterako dira Uni frontoiko kantxara», esan dute. PARTIDAK Zapatuan, urriak 10, 18:00ean, Uni frontoian. 1. Partida. Arbe-Salegi/ Antxon-Etxeba. 2. Partida. Goikoetxea-Inza/ Egiguren II-Alliez I. SARRERAK Urriaren 10ean egongo dira salgai. Goizean. 12:00etatik-13:00etara. Arratsaldean. 17:00etatik aurrera. Prezioa. 12 euro. Sarrerak ez dute zenbaki zehatz bat izango.