Mutrikuko Motz Motzian lehiaketan parte hartzeko epea zabalik dago
Mutrikuko Zine Forum Taldeak urtero antolatzen duen Motz Motzian V. film laburren lehiaketa abian da. “Adin guztietako mutrikuarrok kontatzeko dugun istorio hori irudi eta soinu bitartez partekatzeko aukera ederra emango digu Motz Motzian sariketak”.
Antolatzaileek nabarmendu dutenez film laburrak urriaren 31a aurretik utzi beharko dira Kalaputxi herri aldizkariko egoitzaren (Barrenkale 12, behea) postontzian. Era berean, lanak eskura aurkeztu nahi dituztenek horretarako aukera izango dute urriaren 31n, 11:00etatik 14:00etara bitartean, Kalaputxiren egoitzan.
Euskara hutsean
Beste urte batez, mutrikuar guztiei zinema euskaraz egiteko gonbidapena luzatu diete. Mutrikuarra den edo Mutrikun bizi edo ikasten duen edonork parte hartu dezake lehiaketan.
Lanen gaia librea izango da eta, hauek euskara hutsean aurkeztu beharko dira. Horrez gain, 10 minutu baino gutxiago iraun behar duten filmak bakarka edo taldeka ere aurkeztu daitezkeela azaldu dute antolatzaileek. Hala eta guztiz ere, bakoitzak gehienez film labur bat aurkeztu ahal izango du. Aurkezteko formatuari dagokionez, DVD-Bideo formatuan aurkeztu beharko dira. “Kamera bat edo telefono mugikor bat hartu eta 10 minutu baino gutxiagoko istorio bat erakusteko aukera izango dute herritarrek”.
Zine Forum taldekoek aurreratu modura, azaroan egingo da sari banaketa eta jasotzen diren lan guztiekin emanaldi berezia. Sariei dagokionez, bi sari banatuko dira: alde batetik, Xiri sari nagusia, eta bestetik, Herritarren saria.
Motz Motzian lehiaketako parte hartzaileak
