Euskal baleontzien aztarnak bilatzeko proiektuaz berba egingo dute Lekeition
5A Incentive Planners enpresak euskal baleontzien aztarnak jarraituz Kanadara egingo duen espedizioa aurkeztuko dute gaur [urriak 28] Lekeition, 19:30ean, kultur etxean. Espedizioan norbanakoek ere parte hartu ahalko dutela jakitera eman dute.
2017ko ekainaren 15etik 22ra egingo da espedizioa. «Orain arte inoiz egin ez den espedizio kulturala izango da. Gure asmoa da euskal baleontzien aztarnen atzetik joanda, urteak atzera baleontziek Kanadako uretan egiten zituzten ibilbideak gertutik ezagutzea», azaldu dute antolatzaileek.
Horretarako, hainbat hitzaldi ari dira eskaintzen Bizkaian. «Historikoki balearen arrantzagaz lotura zuzena eduki duten herrietan ari gara eskaintzen hitzaldiak. Eta Lekeitio horietako bat da». Hitzaldian itsas historialari batek ere parte hartuko duela jakitera eman dute. «Berak zenbait azalpen emango ditu».
Zehatz esateko, espedizioak euskal baleontziek Terranovan eta Labradorren (Kanada) bizi izandakoak ezagutara eman nahi ditu. «Itsasontziz egingo den abentura honen partaide izan ahal dira herritarrak. Eta proiektua azalduz, herritarrak parte hartzera animatu nahi ditugu», gaineratu dute.
Espedizioaren xehetasunak
Espedizioa Ocean Endeavour itsasontzian egingo da. «Ontzia oso ondo prestatuta dago horrelako ibilbide bat egiteko». Espedizioak, gainera, historia, abentura eta natura uztartuko dituela diote. «Espedizioan hitzaldiak eta bestelako jardunaldiak ere eskainiko dira».
St. John’s-eko (Kanada) portutik aterako da espedizioa, eta zortzi egun beranduago portu berdinean amaituko da. Tartea horretan, ondoko lekuak bisitatuko dituzte: Fogo uhartea, Chateau Bay, Chateau Bay, Gros Morneko Parke Naturala, St. Pierre eta Miquelon eta Placentia.
Interesatuei izena ahalik eta azkarren emateko aholkua ematen diete antolatzaileek; plazak mugatuak dira. Horretarako, ondoko webgunean sartu eta prezioak, baldintzak eta espedizioaren bestelako xehetasunak ezagutu ahal izango dituzte: www.ballenerosvascos.info.
‘Ocean Endeavour’ ontzia.
